Petkoviq: Rashiqi pështyu mbi viktimat serbe duke mbështetur UÇK-në

Drejtori i Zyrës për Kosovë dhe Metohi në Qeverinë e Serbisë, Petar Petkoviq, kritikoi ministrin për Komunitete dhe Kthim në Qeverinë e Kosovës, Nenad Rashiq, për mbështetjen që i dha vendimit për ofrimin e mbrojtjes për komandantët e UÇK-së para gjykatës në Hagë. Petkoviq deklaroi se Rashiqi, duke mbështetur UÇK-në, ka pështyrë mbi viktimat serbe.

“Ndërsa i shpreh mbështetjen më të fuqishme listës studentore të bllokadave, Nenad Rashiq sot, në mbledhjen e të ashtuquajturës qeveri në Prishtinë, votoi për vendimin për ofrimin e mbrojtjes për komandantët e UÇK-së terroriste para gjykatës në Hagë. Pra, brenda së njëjtës ditë, shërbëtori i Kurtit, Rashiqi, mbështet si studentët që organizojnë bllokadat, ashtu edhe Thaçin, Veselin, Krasniqin dhe Selimin, kriminelët më të mëdhenj ndaj popullit serb. Rashiqi, i cili sot pështyu mbi viktimat serbe duke mbështetur UÇK-në, deklaron se mbështetja pa rezerva për të ashtuquajturën listë studentore është ‘detyrim qytetërues’”, shkroi Petkoviq në rrjetin social “X”.

Ai shtoi se Albin Kurti është ndërhyrë fuqishëm në zgjedhjet serbe, duke shpresuar në shkatërrimin e Serbisë.

“Serbia e bashkuar nuk do t'ua lejojë këtë, jua garantojmë!!!”, deklaroi Petkoviq.

Rashiqi nuk mori pjesë sot në mbledhjen e Qeverisë së Kosovës, në të cilën u mor vendimi për formimin e Grupit Punues të ngarkuar me hartimin dhe koordinimin e strategjisë lidhur me procedurën e apelit para Dhomave të Specializuara në rastin e ish-udhëheqësve të dënuar të UÇK-së, por ka deklaruar se beson që zëvendësministri kishte marrë miratimin e tij për të votuar në favor të këtij vendimi.