Radojeviq: Pushteti joligjor në Mitrovicën e Veriut merr vendime të paligjshme për ndryshimin e përdorimit të tokës

Kandidati i Listës Serbe për kryetar të Mitrovicës së Veriut, Millan Radojeviq, deklaroi se „këshilltarët joligjorë dhe jolegjitimë“ të Kuvendit të Komunës së Mitrovicës së Veriut po marrin sërish vendime kundërligjore, duke pasur parasysh se në seancën e djeshme morën vendim për ndryshimin e përdorimit të tokës nga bujqësore në ndërtimore, ndonëse, sipas Radojeviqit, me ligj nuk kanë të drejtë ta bëjnë një gjë të tillë.

Radojeviq ka thënë se për këtë vendim askush nuk kishte dijeni, nuk është mbajtur asnjë debat publik, as nuk është organizuar ankand publik, gjë që, siç tha ai, asambleistët janë të obliguar ta bëjnë sipas ligjit.

„Neni 10, i cili flet për kufizimet e Komunës: Kuvendi i Komunës dhe pushteti ekzekutiv komunal nuk mund të marrin asnjë vendim që ka të bëjë me përdorimin dhe shkëmbimin e pasurisë së paluajtshme komunale nga dita kur presidenti shpall zgjedhjet lokale. Pra, ky vendim është plotësisht kundërligjor, plotësisht joligjor dhe i siguroj të gjithë qytetarët se, pas largimit të këtij pushteti joligjor dhe jolegjitim komunal dhe ardhjes së pushtetit të ri, të gjitha vendimet do të anulohen, ndërsa ata që kanë votuar për këto vendime kundërligjore do të përgjigjen para gjykatave kompetente,“ theksoi Radojeviq.

Ai bëri thirrje Ministrisë së Vetëqeverisjes Lokale që të veprojë sipas ligjit dhe të anulojë „vendimin joligjor dhe të paligjshëm“ të Kuvendit të Komunës së Mitrovicës së Veriut.

Kuvendi i Komunës së Mitrovicës së Veriut dje mori vendim për ndryshimin e destinimit të gjithsej shtatë parcelave nga tokë bujqësore në tokë ndërtimore.