Spahiu: Zgjedhjet e reja nuk i përshtaten askujt, ka pak mundësi që Kurti të mos formojë qeverin

Analisti politik Nexhmedin Spahiu vlerëson se nuk është në interes të Vetëvendosjes që të mos formohet qeveria dhe të shpallen zgjedhje të reja që do të mbaheshin në të njëjtën kohë me ato lokale, sepse ajo parti nuk do të merrte më shumë vota se sa fitoi në zgjedhjet e 9 shkurtit.

Zhvillimi i njëkohshëm i zgjedhjeve të reja parlamentare krahas atyre vendore, sipas tij, nuk do t'i përshtatej askujt.

“Pjesa më e madhe e deputetëve që janë zgjedhur në këto zgjedhje nuk janë të garantuar se do të zgjidhen nëse do të përsëriten zgjedhje dhe njerëzit në radhë të parë mbrojnë interesat e tyre personale, pastaj ato partiake dhe pastaj ato kombëtare”, thotë Spahiu.

Ai beson se ka shumë pak mundësi që Aljbin Kurti të mos formojë qeveri tani.

Edhe pse PDK-ja pretendon se mund të bëjnë koalicion shumë shpejt, nëse Vetëvendosje nuk ia del, Spahiu mendon se kjo nuk është e realizueshme sepse LDK-ja nuk është e interesuar të jetë në koalicion as me Vetëvendosjen dhe as me PDK-në.

Ndryshe, Arton Demhasaj nga AAK-ja ka akuzuar Vetëvendosjen se qëllimisht po e zvarrit procesin e formimit të institucioneve të reja, me qëllim që në vjeshtë të shpallen zgjedhjet e jashtëzakonshme parlamentare, të cilat do të mbahen së bashku me ato lokale.