Staroviq: Rama, kur flet për Kosovën, shmang më të rëndësishmen – Kartën e OKB-së dhe Rezolutën 1244

Ministri për Integrime Evropiane në Qeverinë e Serbisë, Nemanja Staroviq, deklaroi sot se kryeministri i Shqipërisë, Edi Rama, kur flet për Kosovën, shmang elementin më të rëndësishëm – Kartën e OKB-së dhe Rezolutën 1244 të Këshillit të Sigurimit të OKB-së, e cila vazhdon të jetë plotësisht në fuqi. Ai theksoi se Kosova ndodhet brenda kufijve të Serbisë, të njohur nga OKB-ja.

Staroviq, duke reaguar në platformën “X” ndaj pretendimeve të Ramës se territori i Kosovës nuk është territor i Serbisë, theksoi se kufijtë e njohur nga OKB-ja janë dhe duhet të mbeten të paprekshëm, qoftë kur flasim për Serbinë, Ukrainën, Kinën apo Qipron dhe, natyrisht, edhe për Shqipërinë.

“Thirrja për marrëdhënie të mira fqinjësore, ndërkohë që refuzohet respektimi i integritetit territorial të fqinjit, nuk është asgjë më shumë se retorikë boshe dhe hipokrite. E njëjta gjë vlen edhe për diskutimet pompoze mbi vlerat evropiane dhe të drejtat e komunitetit serb, duke shmangur me kujdes çdo përmendje të Marrëveshjes së Brukselit të vitit 2013 dhe të Asociacionit të komunave me shumicë serbe, i cili ende nuk është themeluar. Kjo është çështja e vërtetë – jo lumi Ibër apo planet për menaxhimin e ujërave”, deklaroi Staroviq.

Ai shtoi se të gjithë synojmë me të drejtë një të ardhme evropiane dhe se duhet të punojmë së bashku për këtë qëllim fisnik, por se drejtësia dhe ndershmëria përbëjnë të vetmin themel të qëndrueshëm.

“Pa to, diskutimet për marrëdhëniet e mira fqinjësore mbeten vetëm kështjella prej rëre me mangësi serioze strukturore”, theksoi Staroviq.

Edi Rama më herët, në një postim në rrjetin “X”, deklaroi se territori i Kosovës nuk është territor i Serbisë dhe se burimet natyrore që ndodhen në të nuk janë burime të Serbisë.

Lidhur me paralajmërimet e presidentit të Serbisë, Aleksandar Vuçiq, se do të shqyrtohet ndryshimi i rrjedhës së lumit Ibër, ai deklaroi se Ibri është “sistem ujor ndërkufitar”.

Ministri i Punëve të Jashtme i Serbisë, Marko Gjuriq, i tha kryeministrit shqiptar Edi Rama, lidhur me postimin e tij për ndryshimin e mundshëm të rrjedhës së Ibrit, se qëndrimi i Serbisë për Kosovën nuk është folklor, por bazohet në Kushtetutë. Ai theksoi se diskutimet për Ibrin nisën vetëm për shkak se autoritetet në Prishtinë po e shfrytëzojnë këtë verë për të rrënuar shtëpitë serbe, pa procedurën e parashikuar, përgjatë brigjeve të Liqenit të Gazivodës dhe lumit Ibër.