Ulutash: Stabiliteti në Kosovë varet nga diplomacia, jo nga dhuna

Komandanti i KFOR-it, gjeneral-major Ozkan Ulutash, vlerëson se situata e sigurisë në Kosovë aktualisht është stabile, por thekson se KFOR-i po e ndjek nga afër situatën në terren, me qëllim sigurimin e një ambienti të qetë dhe të sigurt si dhe lirinë e lëvizjes për të gjithë njerëzit që jetojnë këtu.

Gjeneral Ulutash, në një intervistë për TV Most, thekson se NATO e mbështet fuqishëm dialogun mes Beogradit dhe Prishtinës nën ndërmjetësimin e BE-së si i vetmi kuadër për zgjidhjen e çështjeve të hapura. Ai gjithashtu u bën thirrje të gjitha palëve që të angazhohen në mënyrë konstruktive në dialogun nën kujdesin e BE-së për normalizimin e marrëdhënieve ndërmjet Beogradit dhe Prishtinës, sepse, siç thekson ai, rruga drejt stabilitetit të qëndrueshëm është politike dhe jo ushtarake.

Duke folur për situatën e sigurisë, Ulutash u ndal edhe te periudha kur në mandatin e tij të parë ishte në krye të misionit të KFOR-it, duke theksuar se, nga kjo distancë kohore, në krahasim me vitin 2023, nuk ka pasur dhunë me atë intensitet.

“Situata e sigurisë në Kosovë aktualisht është stabile. Mandati im i parë në krye të misionit të KFOR-it erdhi menjëherë pas incidenteve serioze të sigurisë në veri të Kosovës në vitin 2023 dhe rritjes së mëvonshme të pranisë së KFOR-it në terren. Që atëherë nuk kemi qenë dëshmitarë të përsëritjes së dhunës me atë intensitet. Megjithatë, mbetemi të kujdesshëm dhe të vendosur në mënyrë adekuate. KFOR-i vazhdon të monitorojë situatën në gjithë Kosovën për të siguruar një ambient të sigurt për të gjithë njerëzit që jetojnë këtu, si dhe lirinë e lëvizjes, në përputhje me mandatin tonë afatgjatë të bazuar në Rezolutën 1244 të Këshillit të Sigurimit të OKB-së nga viti 1999”, tha Ulutash.

I pyetur se si e vlerëson situatën në veri të Kosovës pas zgjedhjeve lokale dhe marrjes së detyrës në komunat veriore nga kryetarët e zgjedhur në mënyrë legjitime, përfaqësues politikë të serbëve të kësaj zone, Ulutash thekson se situata është e qetë, por jo plotësisht stabile.

“Situata e sigurisë në veri të Kosovës aktualisht është e qetë, por ende nuk është plotësisht stabile. Nga perspektiva jonë, procesi i dorëzimit të detyrës mes kryetarëve në largim dhe atyre të rinj ka kaluar në mënyrë paqësore. KFOR-i vazhdon të kontribuojë duke siguruar një kornizë sigurie dhe hapësirë për vazhdimin e dialogut politik. Kjo është thelbësore për arritjen e zgjidhjeve të qëndrueshme që do t’u shërbejnë të gjitha komuniteteve. Rruga drejt stabilitetit afatgjatë është politike. Stabiliteti në Kosovë dhe në rajon varet nga fakti nëse të gjitha palët do të zgjedhin diplomacinë dhe jo dhunën”, thotë Ulutash.

Duke kujtuar ngjarjet e vitit 2023, komandanti i KFOR-it thekson se ky mision siguron një ambient të sigurt për të gjithë njerëzit në Kosovë dhe se ka një prani të dukshme në gjithë territorin.

“KFOR-i vazhdon të zbatojë plotësisht dhe në mënyrë të paanshme mandatin e tij të OKB-së për të siguruar një ambient të sigurt për të gjithë njerëzit në Kosovë, përfshirë komunitetin serb. Ky është gjithmonë fokusi ynë. Përkushtimi ynë ndaj misionit është i fortë. Si përgjigje ndaj dhunës së pajustifikuar në vitin 2023, kemi rritur aktivitetet dhe patrullimet në veri të Kosovës. Jemi rregullisht të pranishëm atje dhe mbajmë kontakte me të gjithë aktorët relevantë për të siguruar shkëmbim të shpejtë informacioni dhe transparencë. Në tërësi, KFOR-i ka një prani të dukshme dhe fleksibile në gjithë Kosovën”, tha ai.

Sa i përket dialogut ndërmjet Beogradit dhe Prishtinës, komandanti i KFOR-it tha se NATO e mbështet fuqishëm dialogun, duke e konsideruar se rruga drejt stabilitetit afatgjatë është në thelb politike.

“NATO vazhdon të mbështesë fuqishëm dialogun nën kujdesin e BE-së si i vetmi kuadër për zgjidhjen e çështjeve të hapura dhe arritjen e zgjidhjeve që respektojnë të drejtat e të gjithë njerëzve. Edhe pse KFOR-i jep një kontribut të rëndësishëm ushtarak në ruajtjen e një ambienti të sigurt, rruga drejt stabilitetit afatgjatë është në thelb politike. Është e domosdoshme që edhe Beogradi edhe Prishtina të marrin pjesë me mirëbesim për zbatimin e marrëveshjeve të arritura”, theksoi Ulutash, duke shtuar se NATO vazhdon të mbështesë fuqishëm dialogun nën ndërmjetësimin e BE-së me qëllim normalizimin e marrëdhënieve ndërmjet Beogradit dhe Prishtinës.

“KFOR-i do të vazhdojë të kontribuojë në këtë proces të rëndësishëm. Njëkohësisht, është thelbësore që të dyja palët të marrin pjesë plotësisht dhe në mënyrë konstruktive në këtë kuadër. Në fund, stabiliteti duhet të jetë i tillë që t’u shërbejë të gjitha komuniteteve në mënyrë që të jetë i qëndrueshëm”, shtoi ai.