Vuçeviq: Dialogu është zgjidhja e vetme për Beogradin, por Kurti nuk do të ndalet sepse e do Kosovën pa serb

Ministri serb i Mbrojtjes, Millosh Vuçeviq, para raundit të ri të negociatave në Bruksel tha se për Beogradin dialogu është e vetmja rrugë për zgjidhjen e problemit, por se situata është e vështirë sepse, siç tha ai, regjimi i Albin Kurtit nuk heziton të tregojë forcën dhe vetëm merret me keqtrajtimin e serbëve.

“Ata vazhdojnë të arrestojnë serbët me disa aktakuza të vjetra, kemi pasur 15 sulme ndaj fëmijëve serbë, po kaq tentime për të penguar funksionimin e sistemit shëndetësor të vendit, sulme të panumërta në objektet fetare. Bllokada e produkteve serbe po vazhdon për tre muaj, ne po mundohemi në mënyra të ndryshme të parandalojmë mungesën e barnave. Në një atmosferë kaq të vështirë, ne vazhdojmë të tregojmë vullnet të mirë dhe të përpiqemi të vazhdojmë dialogun. Dhe më e rëndësishmja - të ruajmë paqen. Detyra e Serbisë është të ruajë komunitetin serb dhe kishat në Kosovë e Metohi, sepse kur ekzistojnë ato, ekziston edhe Serbia”, tha Vuçeviq për Kurir.

Duke folur se çfarë mund të presin serbët e Kosovës në periudhën e ardhshme dhe deri ku mund të shkojnë autoritetet në Prishtinë, Vuçeviq ka theksuar se është e vështirë të bëhen vlerësime optimiste përderisa Kurti është aty ku është.

“Çdo ditë regjimi i Albin Kurtit merret vetëm me keqtrajtime të serbëve dhe bën gjithçka për t’ua vështirësuar jetën”. Baza e politikës së Kurtit është pastrimi etnik i Kosovës nga serbët dhe këtë po mundohet ta arrijë me mjete të ndryshme, presione, duke rrezikuar jetën e serbëve. Kurti nuk do të ndalet. Kam frikë se do të ketë përshkallëzim të mëtejshëm në fushë, sepse nuk shoh asnjë grimcë vullneti nga ana e bashkëpunëtorëve të tij dhe atij që të heqë dorë nga qëllimet e tyre”, tha Vuçeviq.

Ai po ashtu ka theksuar se Serbia nuk do të lejojë që serbët të largohen nga vatrat e tyre shekullore.

"Ne po bëjmë gjithçka për t'u ndihmuar, për t'i inkurajuar dhe forcuar. Ditët dhe javët në vijim do të jenë të vështira. Pas Brukselit, Presidenti Vuçiç do të udhëtojë në seancën e Asamblesë së Përgjithshme të Kombeve të Bashkuara. Shpresoj që të bëhet një vlerësim objektiv se kush po shkakton trazira dhe konflikte në Kosovë e Metohi dhe kush nuk merr pjesë në to. Serbia nuk është as provokatore, as nuk është në interesin e saj të krijojë konflikte të vazhdueshme, por është e vendosur në anën e së drejtës ndërkombëtare dhe Parimeve të OKB-së”, tha Vuçeviq.