Vujinoviq: Kurtit i konvenon zvarritja, opozita po lufton për mbijetesë

Studiuesi i çështjeve të sigurisë, Nikolla Vujinoviq, vlerësoi se Kosova ndodhet në një periudhë postlegaliste, pasi politika zhvillohet pa marrë parasysh rregullat. Megjithatë, ai i kupton veprimet e opozitës, sepse, siç thotë, ajo po lufton për mbijetesë.

Vujinoviq thotë se të gjitha partitë opozitare kanë synimet e tyre në kuadër të krizës aktuale.

“LDK, përkatësisht Osmani dhe Abdixhiku, presin një marrëveshje. Për këtë arsye, atyre u konvenon kjo zvarritje, sepse mendoj se Kurti po e zvarrit konstituimin e Kuvendit për të arritur një marrëveshje që të mos ketë zgjedhje të reja, ndonëse njëkohësisht, paralelisht dhe në mënyrë paradoksale, synon zgjedhje të reja. PDK e bën këtë për t’ia cenuar integritetin si LDK-së, ashtu edhe Vetëvendosjes, duke e paraqitur këtë të fundit si dikë që shkel të gjitha rregullat, cenon institucionet dhe i bllokon ato. Ndërsa Aleanca, siç pamë, e gjuan me vezë. Prisja që ata ta bënin këtë, sepse janë të paktë, nuk kanë kurrfarë fuqie politike dhe në këtë mënyrë mund të fitojnë pikë politike”, tha ai për Kosovo online.

Ai shtoi se situata politike është e paligjshme dhe jokushtetuese që nga viti i kaluar.

“Ne e dimë se Gjykata Kushtetuese mori vendim se pritja deri më 6 mars ose 6 prill për zgjedhjen e presidentit është kushtetuese, ndonëse shumë njohës të sistemit kushtetues të Kosovës thanë se nuk është. Kam parë një sërë ish-gjyqtarësh të Gjykatës Kushtetuese që mendonin se kjo ishte jokushtetuese – vendimi i Gjykatës Kushtetuese është jokushtetues. Ndodhemi në një periudhë postlegaliste, ku politika zhvillohet pa marrë parasysh rregullat. Në thelb, vetëm pushteti është i rëndësishëm”, tha Vujinoviq.

Sipas tij, Albin Kurtit i konvenon zvarritja.

“Nëse nuk gaboj, zoti Sadiku tha se Kuvendi nuk do të konstituohet deri në shtator. Kjo nuk më befason aspak. E kujtojmë shkurtin e vitit të kaluar – për dhjetë muaj Kuvendi nuk ishte konstituuar. Është e vërtetë se atëherë ishte penguar sipas rregullave, ndërsa tani është shkuar edhe përtej kësaj. Vendimi kushtetues i marsit të vitit 2025 u zhbë, përkatësisht u shkel që të premten në mbrëmje. Të shtunën në mëngjes tashmë ishte shkelur. Kur i keni shkelur një herë rregullat, gjithçka që ndodh më pas përbën shkelje. Si përfundim, sjellja e opozitës nuk më befason; ajo po lufton për mbijetesë dhe beson se kjo do të ndikojë negativisht te votuesit e Vetëvendosjes. Vetëvendosjes i konvenon zvarritja, sepse dëshiron ta rraskapitë partnerin e saj të mundshëm të koalicionit, i cili hyri në bisedimet për koalicion për të përfituar diçka. Por Vetëvendosja nuk po ia jep atë”, thotë Vujinoviq.

Ai pret një verë të nxehtë në Kosovë, por kjo, siç thotë, mund të jetë edhe në dëm të komunitetit serb.

“Mund të presim një verë të nxehtë, por kam frikë se komuniteti serb do të jetë një nga objektivat e kësaj nxehtësie. Por do të ishte befasuese për mua që bashkësia ndërkombëtare të vinte para shtatorit ose tetorit dhe ta zgjidhte këtë problem. Nuk do të dalë asgjë nga e gjithë kjo. Kjo, guxoj të them, telenovelë spanjolle do të vazhdojë në parlamentin e Kosovës”, përfundon Vujinoviq.