Beqiri: Qytetarët e Kosovës më së shumti i shfrytëzojnë pushimet dimërore për të vizituar qytetet evropiane

Përfaqësuesja e agjencisë turistike “Veneta Travel” nga Prishtina, Fatmire Beqiri, thotë se gjatë muajve të dimrit dhe festave të Vitit të Ri, qytetarët e Kosovës më së shumti i shfrytëzojnë pushimet për të vizituar disa nga qytetet evropiane, ndërsa Bullgaria dhe Franca janë destinacione të preferuara për dashamirët e skijimit.

“Tani kemi disa fluturime të reja direkte, për shembull për në Amsterdam, por shumë njerëz nga Prishtina dhe Kosova jetojnë në Gjermani dhe shumë qytetarë e vizitojnë këtë vend”, thotë Beqiri.

Një nga destinacionet e preferuara të dimrit është Bullgaria, me vendpushimet e njohura të skive si Bansko dhe Borovets.

"Shumë njerëz udhëtojnë në Bullgari, ne e kemi atë në ofertë. Nisjet janë nga Shkupi, por nëse është grup, atëherë ne e organizojmë udhëtimin nga këtu”, shpjegon bashkëbiseduesja ynë.

Për adhuruesit e skijimit, shton ajo, edhe Franca është kthyer në një destinacion të rëndësishëm.

“Fushat e skijimit janë të mira, ne kemi bërë rezervime prej kohësh. Këto janë destinacione shumë të bukura”, thotë Beqiri.

Edhe pse Turqia është kryesisht më tërheqëse në verë, ajo thotë se ka interes të madh edhe për të udhëtuar në këtë vend në dimër.

“Turqia dhe Stambolli janë gjithashtu të njohura në dimër. Turqia dihet se ofron një shërbim gjithëpërfshirës dhe njerëzit tashmë janë mësuar të kenë gjithçka kur udhëtojnë atje”, thekson ajo.

Kur bëhet fjalë për festat e Vitit të Ri, Beqiri thotë se qytetarët e Kosovës gjithnjë e më shumë po planifikojnë udhëtimet e tyre.

“Ata shkojnë ku të duan. Ata kërkojnë një ofertë për një vend dhe e marrin atë. Më parë, kur kërkoheshin viza, bënim udhëtime në grup, ishte e vështirë të udhëtoje diku, për shembull në Itali. Tani zgjedhin vetë, se nuk e kanë problem vizën. Ata udhëtojnë ku të duan”, thotë Beqiri.