Hill: Ballkani i Hapur krijon fqinjësi të mirë dhe lehtëson lëvizjen përtej kufijve

Ambasadori amerikan në Serbi Kristofer Hill tha në Shkup se nisma e Ballkanit të Hapur krijon një ndjenjë të fqinjësisë së mire dhe se kjo nismë kontribuon që kufijtë të mos ndajnë, por bashkohen dhe hapen, që është veçanërisht e rëndësishme në Ballkanin Perëndimor.

Në konferencën e sotme “Sfidat dhe ngjarjet e sigurisë rajonale në vendet e Ballkanit Perëndimor” organizuar nga Qendra Presidenciale për Edukim Politik, Hill tregoi se qëllimi i Ballkanit të Hapur është të krijojë një ndjenjë të komunitetit dhe mënyrave të funksionimit me fqinjët.

“Ballkani i Hapur krijon një fqinjësi të mirë dhe lehtëson fluksin e lëvizjes përtej kufijve. Qëllimi i iniciativës është krijimi i një mënyre bashkëpunimi me fqinjët”, tha ambasadori Hill, pas së cilës ai përmendi dialogun ndërmjet Serbisë dhe Kosovës, si dhe situatën në Bosnje dhe Hercegovinë, si sfidat më të mëdha rajonale për momentin.

I pyetur nëse ka shpresë për të sjellë optimizmin amerikan në Ballkan, ai u përgjigj se mendon se optimizmi ekziston.

“Sinqerisht, nëse shkoni në SHBA, mund të përballeni me disa gjëra të tjera në atë zonë. Por sinqerisht, unë isha këtu në 1996 dhe nuk kishte shumë arsye për t'u ndjerë shumë optimist, dhe shikoni se çfarë po ndodh në këtë periudhë”, tha ai dhe shtoi se njerëzit kanë pritshmëritë e tyre, dhe kur niveli i pritshmërisë rritet, atëherë niveli i optimizmit është më i ulët.

Hill beson se udhëheqja ruse, siç tha ai, "e çoi qytetërimin në pyll".

“Një udhëheqje e tillë në Rusi e ka çuar qytetërimin në pyll. Tragjedia është ajo që i bënë Ukrainës, një tragjedi e madhe, por edhe një tragjedi e madhe që i bënë vetes. Ne duhet dhe kur them ne, po flas për SHBA-në dhe aleatët e saj, ne duhet të jemi fituesit, duhet të jemi të qartë se nuk duhet të sulmoni fqinjin tuaj dhe të vrisni fëmijët e fqinjit tuaj. Kjo është shumë emocionale, por ka gjëra për të cilat duhet të jemi të qartë dhe të gatshëm për t'u marrë me to derisa të fitojmë”, tha ambasadori Hill.