Mijushkoviq: Inflacioni si problem ekonomik dhe shoqëror

Ekonomisti Velko Mijushkoviq deklaroi se kostot e energjisë dhe ushqimeve janë faktorët që kontribuojnë më së shumti në rritjen e inflacionit, por ajo që krijon presion shtesë inflacionist në rajon, përfshirë edhe Kosovën, është varësia e lartë nga importi. Ai konsideron se inflacioni nuk është vetëm problem ekonomik, por edhe shoqëror, pasi prek qytetarët më të varfër.

„Kostot e energjisë barten në të gjithë zinxhirin e furnizimit, kështu që në momentin kur ato rriten, së pari rriten kostot e transportit dhe logjistikës, pastaj kostot e prodhimit dhe shpërndarjes dhe, si pasojë, rriten në mënyrë zinxhirore çmimet e të gjitha produkteve“, tha Mijushkoviq, duke theksuar se një faktor shtesë rreziku për Kosovën është politika e saj specifike monetare dhe përdorimi i euros si valutë.

Mijushkoviq paralajmëron se inflacioni ka ndikim negativ në pabarazinë shoqërore, pasi në momentin kur ai rritet, shtresat më të varfra të shoqërisë detyrohen të shpenzojnë më shumë para për ushqime, shërbime komunale dhe shpenzime të ngjashme.

„Masat që do të zbatoheshin duhet të përqendrohen në ndihmën për kategoritë më të varfra, përmes ndihmave të njëhershme, zgjidhjes sistematike të problemit të furnizimit me energji gjatë sezonit dhe masave të ngjashme“, theksoi Mijushkoviq, duke shpjeguar se këto janë masat e para konkrete që mund të zbusin efektet e rritjes së inflacionit në buxhetet e qytetarëve.

Ai shton se nuk duhet të ndërmerren masa të pakontrolluara që do të zbatoheshin për të gjithë, pasi, sipas vlerësimit të tij, kjo mund të përforcojë edhe më tej presionet inflacioniste.

Mijushkoviq thekson se inflacioni nuk është vetëm çështje ekonomike, por edhe shoqërore, pasi ushtron presion mbi kategoritë më të varfra të popullsisë.

„Pabarazia shoqërore thellohet dhe shkakton paqëndrueshmëri, përkatësisht tensione politike. Mund të shihni shembullin e Francës, ku përkeqësimi i situatës ekonomike, i shoqëruar me protesta në sektorin e arsimit, ka çuar në përshkallëzimin e përplasjeve në rrugët e Parisit, por edhe të qyteteve të tjera. Situata e keqe ekonomike dhe niveli i shtuar i pasigurisë kanë ndikim negativ në shoqëri“, përfundoi ai.