Naumoski: Inflacioni si pasojë e krizave të akumuluara

Përfaqësuesi i Bordit Drejtues të Universitetit Hajdelberg në Shkup, Sinisha Naumoski, është i bindur se rritja e re e inflacionit në Ballkanin Perëndimor, përfshirë edhe Maqedoninë, është pasojë e krizave të njëpasnjëshme globale, duke filluar nga pandemia, konflikti në Ukrainë, konflikti iraniano-amerikan e deri te kriza energjetike. Banorët e Shkupit pranojnë se pagat janë rritur, por jo aq sa të mos kenë nevojë të bëjnë kujdes se çfarë blejnë dhe si i shpenzojnë paratë.

„Jemi të varur nga importi dhe të gjitha presionet e jashtme reflektohen kryesisht në inflacion, ndërsa goditet standardi i jetesës së qytetarëve. Prandaj, FMN parashikon një normë inflacioni prej katër për qind për Maqedoninë. Ajo që është më e rëndësishme është se nuk parashikon një ulje të shpejtë të tij. Nuk dua tani të krijoj ndonjë përshtypje negative, por është e rëndësishme të jemi të sinqertë me publikun“, tha ai për Kosovo online.

Naumoski thekson se ekonomia maqedonase gjatë gjashtëmujorit të parë shënoi rritje prej 3,2 deri në katër për qind, por qytetarët nuk e kanë ndier këtë rritje.

„Me të drejtë ngrihet ky shqetësim nga të gjithë ne si qytetarë, sepse, siç thashë, nga njëra anë kemi presionin e inflacionit, ndërsa nga ana tjetër problemet globale, përkatësisht presionet mbi vendet me të cilat ekonomia maqedonase bashkëpunon më së shumti, si Gjermania dhe vendet e tjera anëtare të BE-së. Megjithatë, më e rëndësishmja është Gjermania, me të cilën shkëmbimet tregtare tejkalojnë 35 për qind“, shtoi ai.

Naumoski paralajmëron se ekonomia globale nuk po përmirësohet, duke e ilustruar këtë me protestat masive në Francë, Itali, por edhe në Shqipëri. Ai vë në dukje se masat për mbështetjen e qytetarëve janë kryesisht të lidhura me ciklet zgjedhore.

„Nuk duhet të jemi shumë të informuar për të konstatuar se vendimet ndoshta do të merren pas rishikimit të dytë të buxhetit dhe se zgjedhjet mund të mbahen vitin e ardhshëm. Megjithëse unë mendoj se kjo nuk është mirë. Çdo ekonomi kërkon zgjedhje të rregullta ose parashikueshmëri. Ky është qëndrimi im, por ndoshta mund të ndodhë edhe e kundërta“, shtoi ai.

Banorët e Shkupit kanë mendime të ndryshme nëse ka pasur rritje të çmimeve. Ndërsa disa ankohen për çmimet e larta të ushqimeve, të tjerë thonë se kjo ndodh çdo vit në këtë periudhë.

„T'ju them të drejtën, nga sa i ndjek unë këto zhvillime, gjithçka ka mbetur njësoj. As më shtrenjtë, as më lirë“, thotë një bashkëbisedues i Kosovo online, ndërsa një tjetër shton se „çmimet në treg janë të larta“.

Masat e autoriteteve i vlerësojnë si „fjalë boshe“.

„E shihni edhe vetë se është më shtrenjtë se më parë, çmimet janë rritur. Tani na i kanë rritur të ardhurat, por jo aq sa njeriu të ndihet plotësisht i qetë dhe të blejë pa pasur nevojë të bëjë kujdes se sa shpenzon“, përfundon bashkëbiseduesi i Kosovo online.