Samiti BE-Ballkani Perëndimor më 25 nëntor në Bruksel

Udhëheqësit e Bashkimit Evropian dhe të Ballkanit Perëndimor do të takohen më 25 nëntor në Bruksel, ndërsa samiti do t'i kushtohet rëndësisë strategjike të marrëdhënieve ndërmjet BE-së dhe rajonit të Ballkanit Perëndimor, njoftoi Këshilli Evropian.

Bashkimin Evropian në samit do ta përfaqësojë presidenti i Këshillit Evropian, Antonio Costa, së bashku me presidenten e Komisionit Evropian, Ursula von der Leyen.

„E ardhmja e Ballkanit Perëndimor është në Bashkimin Evropian. Anëtarësimi i tyre është prioriteti ynë, ambicia jonë e përbashkët dhe një investim kyç gjeopolitik në këto kohë të trazuara. BE-ja është dhe do të mbetet partneri më i besueshëm i rajonit“, deklaroi presidenti i Këshillit Evropian, Antonio Costa.

Samiti do të jetë një mundësi që BE-ja të rikonfirmojë përkushtimin e saj ndaj perspektivës së anëtarësimit të vendeve të Ballkanit Perëndimor dhe të inkurajojë partnerët që të përshpejtojnë zbatimin e reformave kyçe dhe të përmbushin detyrimet e marra përsipër, të nevojshme për përparimin në rrugën drejt BE-së.

Udhëheqësit do të shqyrtojnë gjithashtu përparimin në integrimin gradual të Ballkanit Perëndimor në BE, veçanërisht përmes Planit të Rritjes për Ballkanin Perëndimor, si dhe mundësitë për avancimin e mëtejshëm të tij.

Në fund, ata do të diskutojnë për sfidat e përbashkëta dhe mënyrat për forcimin e sigurisë dhe qëndrueshmërisë në një mjedis gjeopolitik gjithnjë e më kompleks.