Shahini: Kosova përballet me varfërinë, prodhimi është sektori më i cenueshëm në ekonomi

Kryetari i Aleancës së Bizneseve të Kosovës, Agim Shahini, ka theksuar se Kosova është përballur me varfëri dhe se qeveria nuk ka një strategji për zhvillim ekonomik. Ai vuri në dukje se sektori i ndërtimit dhe ai bankar aktualisht janë më të zhvilluarit, ndërsa prodhimi mbetet më i cenuari.

“Në Kosovë kemi disa sektorë që tashmë po përparojn. Investimet dhe kapitali qarkullues më i madh janë në sektorin e ndërtimit. Më pas vjen sektori financiar dhe bankat, të cilat tashmë janë mjaft të zhvilluara dhe më pas, shërbimet dhe tregtia. Megjithatë, prodhimi mbetet sektori më i dobët në Kosovë”, tha Shahini.

Duke folur për standardin e jetesës së qytetarëve, Shahini tregoi të dhënat e Bankës Botërore, sipas të cilave Kosova është më e varfëra në Evropë, menjëherë pas Ukrainës.

“Kjo ka të bëjë me ne dhe duhet të shqetësojë shtetin dhe qeverinë”, tha ai.

Ai vlerësoi se katër vitet e fundit nuk kanë qenë të suksesshme dhe se qeveria nuk ka pasur strategji zhvillimore.

“Duhet të krijohet një strategji zhvillimi, një strategji kundër varfërisë dhe një strategji për tërheqjen e investimeve të huaja. Vitin e kaluar kemi importuar mallra me vlerë më shumë se gjashtë miliardë euro, që është rritja më e madhe e eksporteve të parave të gatshme drejt vendeve të huaja. Kjo do të thotë se Kosova nuk ka pasur strategji për ekonominë dhe prodhimin vendor”, ka thënë shprehimisht Shahini.

Shahini vlerësoi se bashkëpunimi rajonal është i rëndësishëm, por gjithashtu theksoi se Kosova ka pësuar humbje të mëdha nga masat e Bashkimit Evropian.

“Bashkëpunimi rajonal është i rëndësishëm, veçanërisht me vendet fqinje anëtare të CEFTA-s. Megjithatë, Kosova ka ende sanksione ekonomike nga BE-ja, të cilat janë në fuqi prej dy vitesh dhe humbjet shkojnë në disa drejtime. Ekonomikisht dhe financiarisht janë më shumë se një miliard euro. Politikisht Kosova nuk është pranuar në asnjë institucion ndërkombëtar dhe as nuk ka pasur njohje të reja. Në diplomaci kemi edhe shumë pengesa nga fuqitë e mëdha dhe Kosova nuk mund të integrohet me sanksionet ekonomike që tashmë i kemi”, ka përfunduar Shahini.