Kryetari i Parteshit: Pres paqe, zgjidhja e problemeve infrastrukturore është prioritet

Kryetari i komunës së Parteshit, Dragan Petkoviq, theksoi se është i sigurt që edhe në periudhën e ardhshme komunat me popullsi serbe në Kosovë do të përballen me shumë sfida, por se shpreson për paqe, mbijetesë dhe stabilitet. Sa i përket komunës që do ta udhëheqë edhe në katër vitet e ardhshme, Petkoviq thekson se fokusi do të vihet në zgjidhjen e infrastrukturës rrugore, rrjetit të ujësjellësit, elektrifikimit, si dhe në mirëmbajtjen dhe ndërtimin e objekteve publike.

Në një intervistë për Kosovo online, Petkoviq tha se komunës Partesh–Pasjan, e cila numëron 5.200 banorë, i nevojitet zgjidhja e problemit të përmbytjeve të shkaktuara nga dalja e lumit Morava e Binçës gjatë periudhave me reshje, çka sipas tij përbën një investim të madh për të cilin nevojiten mjete financiare nga niveli qendror.

Sa i përket bashkëpunimit me autoritetet në Prishtinë, Petkoviq theksoi se ai nuk është në një nivel të kënaqshëm.

Duke qenë se shumë banorë të kësaj komune ndodhen jashtë vendit për punë të përkohshme, Petkoviq tha se do të punojë për krijimin e kushteve më të mira të jetesës, në mënyrë që ata të kthehen dhe të mbeten në vatrat e tyre. Si nevojë ai përmendi edhe ndërtimin e një shtëpie për të moshuarit, pasi shumë të moshuar, pas sigurimit të pensionit jashtë vendit, dëshirojnë të kthehen në Partesh.

Cila është struktura etnike e komunës së Parteshit dhe sa banorë ka ajo?

Komuna e Parteshit ka popullsi me shumicë serbe, përkatësisht 100 për qind të popullsisë serbe në komunën Partesh–Pasjan. Ajo ka 5.200 banorë, ndërsa në regjistrimin e fundit janë regjistruar 3.240 persona. Kuvendi i Komunës së Parteshit përbëhet nga 15 asamblistë, prej të cilëve 14 i ka fituar Lista Serbe dhe një asamblist e ka fituar Aleanca Kosovare.

Cilat janë pritjet tuaja në mandatin e ri?

Në periudhën e kaluar, e jam i sigurt se edhe në periudhën e ardhshme do të ketë shumë sfida me të cilat do të përballen komunat me shumicë serbe, përfshirë edhe komunën e Parteshit. Para së gjithash pres paqe, siguri dhe stabilitet, e më pas të merremi edhe me problemet e tjera, sidomos ato infrastrukturore – zgjidhjen e infrastrukturës rrugore, rrjetit të ujësjellësit, elektrifikimit, si dhe mirëmbajtjen dhe ndërtimin e disa objekteve publike, si shkollat, qendrat shëndetësore dhe ambulancat.

Cilat janë prioritetet tuaja nga të gjitha ato që përmendët dhe cilat janë prioritetet e qytetarëve?

Prioritet për qytetarët është padyshim punësimi i njerëzve, por njëkohësisht edhe infrastruktura më e mirë dhe një vend i përshtatshëm për jetesë. Shumë nga njerëzit tanë ndodhen përkohësisht në punë jashtë vendit; nëse kemi kushte të mira jetese në komunën tonë, ata do të kthehen këtu për të jetuar. Shumë prej tyre ditët e pensionit ose pushimet i kalojnë këtu, në shtëpitë e tyre. Ajo që ndoshta është e domosdoshme për komunën tonë është një shtëpi për të moshuarit, ku do të kujdeseshim për personat e moshuar që kanë mbetur vetëm, por që do të qëndronin këtu dhe nuk do të shkonin në Serbinë qendrore.

Sa u përket çështjeve të tjera, bëhet fjalë për furnizimin me ujë – kemi një ujësjellës të papërfunduar në Budrigën e Poshtme, për të cilin presim që tani të përfundohet. Problemi në periudhën e kaluar ishte mungesa e mjeteve të mjaftueshme financiare. Tani do t’i kemi ato dhe presim që tashmë vitin e ardhshëm ta zgjidhim këtë problem, e më pas edhe problemin në Pasjan. Sa u përket projekteve të tjera, ato kanë të bëjnë me rregullimin e infrastrukturës rrugore, e cila është solide, por gjithmonë ka nevojë për përmirësime, si dhe me atë që është shfaqur si problem gjatë kësaj periudhe, përmbytjet dhe rregullimin e shtratit të lumit Morava e Binçës. Shpresojmë që ta zgjidhim këtë problem. Kjo është një investim serioz dhe i madh që komuna nuk do të mund ta zgjidhë e vetme, por shpresojmë në ndihmë.

Si është bashkëpunimi me nivelin qendror? Ky nuk është mandati juaj i parë, më herët keni qenë në krye të komunës, a ka pasur bashkëpunim me autoritetet në Prishtinë?

Duhet të them se bashkëpunimi është në një nivel shumë më të ulët sesa në periudhën e mëparshme. Gjatë vitit të kaluar kemi pasur një projekt për rregullimin e shtratit të lumit nëpër Budrigën e Poshtme; e kemi nisur këtë projekt dhe shpresojmë që ta përfundojmë gjatë vitit të ardhshëm. Projekti tjetër ka qenë rregullimi i infrastrukturës rrugore në territorin e komunës sonë. Për pjesën tjetër, kërkesat dhe nevojat e komunës nuk janë ndjekur mjaftueshëm. Ne jemi një komunë e vogël dhe nuk kemi mjete të mjaftueshme vetanake, prandaj ndihma nga niveli qendror është e domosdoshme, ndërsa deri më tani ajo nuk ka qenë në një nivel të kënaqshëm. Shpresojmë që në të ardhmen kjo ndihmë dhe mbështetje të jetë shumë më e mirë.