Fillipoviq: Dëshmitari nuk e ka identifikuar Millenkoviqin, shpresojmë që edhe të tjerët të jenë të guximshëm

Dëshmitari i cili u mor në pyetje sot në rastin e Dragisha Millenkoviqit, i cili po akuzohet nga Prokuroria Speciale e Kosovës për krim të supozuar të luftës, nuk e ka identifikuar Millenkoviqin si autor të krimit, ka raportuar avokatja Jovana Fillipoviq pas seancës.

Para departamentit special të Gjykatës Themelore në Prishtinë, sot janë marrë në pyetje dy dëshmitarë për rastin Millenkoviqit. Ndërsa i pari pretendonte se e kishte njohur Millenkoviqin në burgun e Lipjanit, i dyti theksoi se nuk mund ta identifikonte atë si autor.

“Dëshmitarët dhanë deklaratat e tyre dhe ajo që është karakteristike është se dëshmitari i dytë në veçanti ka dhënë një deklaratë të sinqertë në të cilën ka thënë se nuk e ka parë Dragishin, se ka qenë i pranishëm në burgun e Lipjanit dhe kjo është plotësisht në pajtim me mbrojtjen tone, sepse ne pretendojmë se ai nuk ka qenë i pranishëm dhe se nuk ka mundur të marrë pjesë në ngjarjet e luftës, gjegjësisht në krimin për të cilin akuzohet”, tha Fillipoviq.

Gjatë seancës, dëshmitari iu drejtua të pandehurit, e shikoi atë dhe tha se nuk kishte informacion dhe as se e kishte pare, si dhe duke mos qenë në gjendje ta identifikojë atë si kryerës të ndonjë vepre penale, theksoi Fillipoviq.

Ajo ka thënë se i njëjti dëshmitar ka dhënë të njëjtin deklaratë në Policinë e Kosovës, për këtë arsye shpreson që dëshmitarët e tjerë të tregohen kaq të guximshëm dhe të japin një deklaratë që është në përputhje me ligjin dhe të vërtetën.

“Ne jemi jashtëzakonisht të kënaqur me atë që mbrojtja ka arritur deri më tani, dhe ka të bëjë me faktin se ne ia kemi vënë në dukje gjykatës të gjitha mangësitë dhe kontradiktat e dëshmitarëve që në çfarëdo mënyre kanë akuzuar Dragisha Millenkoviqin. Gjykatës i mbetet t'i vlerësojë siç duhet ato deklarata dhe vërejtje të dëshmitarëve të bëra nga mbrojtja, veçanërisht me dëshmitarin e sotëm i cili nuk e ka identifikuar si autor të veprës penale”, tha Fillipoviq.

Ajo shtoi se është karakteristike, kur bëhet fjalë për rastet e krimeve të luftës, që viktimat të kujtohen pas 20 vitesh e më shumë të raportojnë autorët, ndonëse, siç thekson, shumë prej tyre kishin informacione se autorët e dyshuar jetojnë në Kosovë.

Dragisha Millenkoviq u arrestua më 21 qershor në Kishnicë.

Millenkoviqi akuzohet se ka qenë roje burgu gjatë konfliktit në Kosovë në vitin 1998 dhe 1999 në burgun e Prishtinës, dega në Lipjan, në cilësinë e zyrtarit dhe në bashkëkryerje me zyrtarë të tjerë, duke shkelur rregullat e së drejtës ndërkombëtare gjatë konfliktit, “keqtrajtonte sistematikisht të burgosurit shqiptarë duke i torturuar në mënyrë çnjerëzore me sende të ndryshme”.

Prokuroria Speciale e Kosovës ka ngritur aktakuzë kundër Millenkoviqit më 26 dhjetor 2023 dhe avokati Dejan Vasiq ka kërkuar që kryeministri i Kosovës Albin Kurti të dëgjohet si dëshmitar në rastin e Millenkoviqit, sepse ai ishte i paraburgosur në burgun e Prishtinës në kohën kur Millenkoviq ishte duke punuar në atë burg.

Pas arrestimit të Millenkoviqit, qytetarët në Graçanicë protestuan me ditë të tëra.