Fillipoviq: I dëmtuari në procedurën kundër Stankoviqit është uzurpator në çështjen civile ku ai duhej të dëshmonte

Avokatja Jovana Fillipoviq theksoi se ndaj të ndaluarit Zoran Stankoviq nga Matiçani, të cilin Prokuroria Speciale e ngarkon për krim lufte, kallëzimi penal është dorëzuar dje, në të njëjtën ditë kur ai u arrestua, duke theksuar se kundër tij nuk është zhvilluar kurrë më parë procedurë penale. Ajo shtoi se i dëmtuari në këtë procedurë është i njëjti person që është uzurpator në çështjen civile në të cilën Stankoviqi duhej të dëshmonte.

Sot, para Departamentit të Posaçëm të Gjykatës Themelore në Prishtinë, u mbajt seanca për caktimin e masave të mëtejshme ndaj Zoran Stankoviqit, ndërsa avokatja e tij, Jovana Fillipoviq, vuri në dukje mospërputhje lidhur me ndalimin e tij.

“Ai akuzohet se ka kryer veprën penale ‘krim lufte’ dhe ajo që është e rëndësishme në këtë rast është se kallëzimi penal kundër tij është paraqitur pikërisht dje, në ditën kur ai është arrestuar, dhe shtrohet pyetja se kush ka mundur ta vendosë atë në ‘stop listë’, nëse kundër tij nuk është zhvilluar më herët hetim. Zorani ka ardhur në Kosovë për të qenë dëshmitar në një çështje civile, ndërsa si person i dëmtuar në çështjen penale për krim lufte paraqitet i njëjti person që është edhe uzurpator në atë procedurë civile”, sqaroi Fillipoviq.

Ajo theksoi se Stankoviqi një javë para arrestimit kishte hyrë lirshëm në Kosovë.

“Të gjitha këto fakte tregojnë se personi që e ka kallëzuar për krim lufte ka një motiv që lidhet me qëllime të tjera, të cilat nuk kanë për synim zbulimin e veprës penale të krimit të luftës, sepse siç e theksova më herët, kundër tij nuk është zhvilluar kurrë procedurë penale dhe ai një javë para arrestimit kishte hyrë lirshëm në Kosovë”, tha ajo.

Gjatë ditës pritet të caktohet masa e mëtejshme në rastin e Zoran Stankoviqit.

Policia e Kosovës njoftoi dje se, me urdhër të Prokurorisë Speciale të Kosovës, ka arrestuar Z. S. për dyshimin se ka kryer veprën penale “krim lufte kundër popullsisë civile”.

“I pandehuri Z. S., si pjesë e një grupi paraushtarak të forcave serbe, dyshohet se ka kryer krime lufte në fshatin Matiçan, komuna e Prishtinës, në periudhën 1998-1999”, thuhet në njoftimin e përbashkët të policisë dhe prokurorisë.