Gjashtë persona u arrestuan për prishjen e munumenteve të varreve në varrezat ortodokse në Plemetin

Gjashtë persona u arrestuan mbrëmë në Obiliq me dyshimin se kanë kryer krimin e dëmtimit të varrezave më 13 dhjetor në Plemetin. Sipas njoftimit të Policisë së Kosovës, pesë persona janë të mitur.

Të dyshuarit u dërguan në paraburgim me urdhër të prokurorit, ndërsa hetuesit kryejnë të gjitha veprimet e nevojshme hetimore dhe procedurale në lidhje me rastin, sipas njoftimit të PK-së.

Ju kujtojmë se më 13 dhjetor, dy monumente varresh u shkatërruan dhe u prishën në varrezat e reja ortodokse në Plemetin pranë Obiliqit, dhe banorët e atij fshati me shumicë serbe njoftuan policinë për të zbuluar dhe ndëshkuar autorët.

Petar Jakovljeviq, një i afërm i të ndjerit, monumentet e të cilit u dëmtuan, thotë se kjo është hera e katërt që dikush ka sulmuar varrezat e reja ortodokse në Plemetin.

"E informova policinë në Obiliq, e informova bashkësinë ndërkombëtare për të drejtat e njeriut në Obiliq. Ne nuk dyshojmë në askënd, do të ishte mëkat të thoja se dyshoj për dikë, por dikush e bëri. Kush, le të hetojnë autoritetet kompetente të ndjekjes penale që janë atje, le të punojë pushteti ekzekutiv në Kosovë dhe të zgjidhë problemet", tha Jakovljeviq.

Me rastin e prishjes së dy monumenteve të varreve, Zyra për Kosovën dhe Metohinë njoftoi në një deklaratë se prishja e varreve serbe të familjes Jakovljeviq në Plemetin pranë Obiliqit është një akt vandalizmi dhe anticivilizimi nga ata që nuk dëshirojnë asgjë të mirë për popullin serb në Kosovë, as nuk duan paqe dhe bashkëjetesë në këto zona.

Rreth 800 serbë jetojnë në Plemetin.