Analistët: Dialogu kyç për përparimin e Kosovës në integrimet në BE

Njohësit e procesit të integrimeve evropiane në Kosovë vlerësojnë se Strategjia për zgjerimin e BE-së, e miratuar në Parlamentin Evropian, konfirmon se zgjerimi tani është bërë prioritet gjeopolitik për Brukselin, por theksojnë se përparimi i Kosovës në këtë rrugë mbetet i lidhur ngushtë me dialogun me Serbinë, raportoi Kosova Press.

Drejtoresha ekzekutive e Grupit për Studime Juridike dhe Politike, Njomza Arifi, vlerësoi se në rrethanat aktuale të sigurisë në Evropë procesi i zgjerimit nuk shihet më vetëm si pjesë e politikës së jashtme të BE-së, por edhe si një domosdoshmëri strategjike për stabilitetin e kontinentit.

Ajo deklaroi se raporti përmend edhe dialogun ndërmjet Kosovës dhe Serbisë si një element të rëndësishëm në rrugën drejt integrimeve evropiane.

“Raporti konfirmon se procesi i zgjerimit për Bashkimin Evropian tani është bërë prioritet gjeopolitik për shkak të kontekstit aktual të sigurisë në Evropë. Për rrjedhojë, procesi i zgjerimit nuk shihet më vetëm si pjesë e politikës së jashtme të BE-së, por edhe si një nevojë strategjike për sigurinë dhe stabilitetin në rajon. Sa i përket Kosovës, një pjesë që përmendet lidhet me dialogun me Serbinë. Është e qartë se për BE-në procesi i integrimit, si për Kosovën ashtu edhe për Serbinë, është i ndërlidhur ngushtë me përparimin në dialog, sepse BE-ja e ka bërë të qartë se nuk është e interesuar të pranojë në radhët e saj anëtare të reja që kanë mosmarrëveshje dypalëshe mes tyre. Prandaj çdo përparim në dialog, si për Kosovën ashtu edhe për Serbinë, do të jetë përparim në rrugën drejt BE-së”, tha ajo.

Arifi konsideron se edhe situata e brendshme politike në Kosovë ka ndikuar në ngadalësimin e reformave që lidhen me procesin e integrimit.

“E kemi theksuar se po hyjmë në vitin e dytë të krizës politike dhe se viti 2025 ishte vit stagnimi për Kosovën për shkak të kësaj krize. Si rrjedhojë, nuk kemi pasur përparim, jo vetëm në dialog, por as në reformat që janë drejtpërdrejt të lidhura me Bashkimin Evropian. Dhe në momentin ku ndodhemi sot, kur zgjerimi është prioritet për Bashkimin Evropian, nuk mund t’i lejojmë vetes kriza të reja politike që do të ndikonin në reformat për të cilat Kosova është zotuar në rrugën e saj të integrimit”, theksoi ajo.

Eksperti për integrime evropiane, Adrijan Zeqiri, thekson se dialogu ndërmjet Kosovës dhe Serbisë mbetet një nga kushtet kyçe për përparimin në procesin e integrimit.

“Këtë BE-ja e ka bërë të qartë si për Kosovën ashtu edhe për Serbinë. Ky raport tregon se ka pasur ngecje në dialog dhe se pa përparim në këtë proces nuk do të ketë hapa të mëdhenj të Kosovës drejt integrimeve evropiane”, tha ai.