Barber: Propozimi i Vuçiqit dhe Ramës është mënyra më e mirë për të parandaluar paqëndrueshmërinë në Ballkan dhe BE

Propozimi i Aleksandar Vuçiqit dhe Edi Ramës që vendet kandidate për anëtarësim në BE të bëhen pjesë e tregut të vetëm dhe zona Shengen pa viza është mënyra më e mirë për të parandaluar paqëndrueshmërinë në Ballkanin Perëndimor dhe Evropë, tha Tony Barber, redaktor i gjat për Evropën dhe kolumnist i Financial Times.

"Nga pikëpamja e politikës praktike, anëtarësimi i plotë në BE ndoshta do të mbetet i paarritshëm në të ardhmen e afërt, duke forcuar paqëndrueshmërinë në rajonin e Evropës ku BE-ja mund ta përballojë më pak. Mënyra më e mirë përpara është zbatimi i planit Vuçiq-Rama, duke u treguar njerëzve si në Ballkanin Perëndimor ashtu edhe në BE se një e ardhme e përbashkët është e dobishme për të dyja palët", vlerësoi Barber në një tekst autorial për portalin e Brukselit Eualive.

Lidhur me iniciativën e Presidentit të Serbisë dhe Kryeministrit të Shqipërisë, të cilën e paraqitën në një artikull të përbashkët në Frankfurter Allgemeine Zeitung në fund të shkurtit, Tony Barber pohon se "ide të tilla tashmë qarkullojnë në Bruksel, si dhe në Berlin dhe Paris".

"Argumentet në favor të tyre janë të dyfishta. Së pari, integrimi ekonomik do të përfitonte si Ballkanin Perëndimor ashtu edhe vendet ekzistuese të BE-së. Së dyti, qasja e re do të shmangte çështje të vështira si ndryshimi i përbërjes së Komisionit Evropian, shtimi i anëtarëve në Parlamentin Evropian, ndryshimi i mënyrës së votimit në BE dhe, mbi të gjitha, dhënia e të drejtës së vetos anëtarëve të rinj", deklaroi ai.

Sipas komentatorit britanik, propozimi i Vuçiqit dhe Ramës "nuk duhet të kuptohet si zëvendësim për anëtarësimin e plotë në BE, i cili duhet të mbetet një qëllim afatgjatë për Ballkanin Perëndimor", raporton N1.

Ai shton se nuk do të jetë e lehtë për të gjitha vendet e rajonit të përmbushin kërkesat edhe për hyrjen në tregun e vetëm dhe se ende duhet shumë punë e vështirë për reformat.

"Edhe pse hulumtimet e reja tregojnë se vendet e Ballkanit Perëndimor janë afërsisht aty ku ishin kandidatët e tjerë në kohën e pranimit, do të duhet ende shumë punë e vështirë për reformat", tha Barber.

Megjithatë, shtoi ai, projekti i zgjerimit të BE-së është një fushë ku evropianët "kanë fuqinë për të formësuar ngjarjet në avantazhin e tyre", dhe rajoni i Ballkanit duhet të jetë përparësia e BE-së kur bëhet fjalë për zgjerimin.

Barber kujton se vetëm një anëtar i BE-së mund të bllokojë veprimet kolektive të BE-së duke përdorur një veto, gjë që i bën shtetet e tjera të BE-së "nervoze për paralizën e ardhshme nëse gjashtë ose më shumë vende do të bashkohen me bllokun, të gjitha me të drejtën e vetos".

"Iniciativa Vuçiq-Rama synon të qetësojë këto frikëra", shtoi ai.

"Dështimi në zgjerim do t'i lërë vendet që duan të bashkohen me BE-në të cenueshme ndaj tensioneve të brendshme dhe ndërhyrjeve të jashtme. Kjo, nga ana tjetër, do të minojë sigurinë e kontinentit në tërësi. Është inkurajuese që si BE-ja ashtu edhe disa vende kandidate më në fund po mendojnë për zgjerimin në një mënyrë mjaft krijuese për të sjellë shumë anëtarë ambiciozë nën ombrellën e BE-së në vetëm pesë vjet", tha Tony Barber.