Bregu: Marrëdhëniet mes Tiranës dhe Teheranit janë të këqija, por nuk pres një sulm të drejtpërdrejtë të Iranit

Analisti politik prof. dr Zylyftar Bregu thotë për Kosovo online se, nga të gjitha shtetet e Ballkanit Perëndimor, Shqipëria mbështet më së shumti veprimet e SHBA-së dhe Izraelit në Iran, por se nuk pret që kjo të shkaktojë një konflikt të drejtpërdrejtë mes Tiranës dhe Teheranit. Megjithatë, ai thekson se rajoni do të ndiejë pasojat ekonomike, para së gjithash rritjen e çmimeve të naftës dhe gazit.

“Së pari, kemi pasoja ekonomike të shkaktuara nga ky konflikt, dhe ato janë pasoja globale. Nuk mund t’i shmangemi kësaj. Siç po shohim, pritet rritje e çmimit të naftës dhe produkteve të gazit, gjë që do të ndikojë menjëherë në ekonomi, në të gjitha fushat e saj. Ky ndikim, edhe pse global, megjithatë është pasoja më e thjeshtë dhe më e vogël në krahasim me pasojat e tjera të kësaj lufte”, thekson Bregu.

Profesori nënvizon mbështetjen shqiptare për SHBA-në dhe Izraelin, si dhe ndërprerjen e marrëdhënieve diplomatike mes Tiranës dhe Teheranit, por megjithatë nuk pret një sulm të Iranit ndaj Shqipërisë.

“Kur flitet për luftë, gjëja e parë që na vjen ndër mend janë pasojat për jetët e njerëzve. Pasojat janë të drejtpërdrejta dhe të tërthorta. Me pasoja të drejtpërdrejta nënkuptojmë pjesëmarrjen e palëve në konflikt dhe, në këtë kuptim, rajoni ynë është larg kësaj lufte. Megjithatë, në rajonin tonë duhet të bëjmë një dallim. Shqipëria është gjeografikisht e largët (nga Lindja e Mesme), por për shkak të veprimeve të saj, për shkak të qëndrimeve të saj, nuk është larg, ndryshe nga vendet e tjera të rajonit. Dallimi i parë është se në Shqipëri kemi një komunitet të opozitës iraniane, gjë që ndikon në marrëdhëniet mes Shqipërisë dhe Iranit. A është ky detaj, apo ky angazhim i Shqipërisë, një motiv për konflikt mes dy vendeve? Jo. Po të ishte kështu, konflikti do të kishte ndodhur edhe më herët. Kësaj duhet t’i shtojmë faktin se Shqipëria ka ndërprerë marrëdhëniet diplomatike me Iranin. Ajo dëboi ambasadën iraniane nga Tirana. Nuk kemi më marrëdhënie diplomatike dhe kjo është gjithashtu një arsye tjetër për probleme”, thotë Bregu.

Ai vlerëson se ekziston mundësia që në Teheran të merret në konsideratë një sulm ndaj Shqipërisë, por se për momentin të gjitha pretendimet për këtë janë lajme të rreme.

“Megjithatë, nuk jam i prirur të besoj se do të ketë pasoja të drejtpërdrejta për ne ose se do të realizohet ajo që po përflitet, e që unë e konsideroj lajm të rremë, sipas të cilit Irani ka parashikuar një sulm ndaj Shqipërisë. Kjo mund të ndodhë, por logjika na thotë se këto lajme deri tani janë të rreme. Pra, kjo mund të jetë një mundësi reale për të cilën mund të diskutohet në qeverinë iraniane, por lajmet nga burime serioze nuk na thonë diçka të tillë. Për momentin bëhet fjalë për lajme të rreme”, theksoi ai.

Duke folur për dallimet fetare brenda Shqipërisë, Bregu thotë se nuk pret që konflikti në Lindjen e Mesme t’i ndajë qytetarët shqiptarë sipas linjave fetare, por vlerëson se ndarje të tilla mund të shfaqen në rajon.

“Sa i përket shqetësimeve lidhur me shumëllojshmërinë fetare që ekziston tek ne, nuk mendoj se Shqipëria do të ketë probleme për shkak të kësaj. Rajoni në tërësi mund të ketë probleme, por nuk mendoj se në Shqipëri do të ketë faktorë të tillë që do të dëmtonin stabilitetin e vendit. Ky është bindja ime, ndoshta gaboj, por besoj se kjo shumëllojshmëri fetare nuk na rrezikon”, tha Bregu.