Brnabiq: Në Kosovë është gjithnjë e më e tensionuar, komuniteti ndërkombëtar hesht

Kryeministrja e Serbisë, Ana Brnabiq, ka thënë mbrëmë se situata në Kosovë është gjithnjë e më e tensionuar dhe ka shtuar se javën e ardhshme do të mbahet një takim tjetër me të gjithë ministrat e qeverisë dhe serbët nga Kosova, raporton Blic.

"Ajo që është e tmerrshme dhe ajo që frikëson dhe shqetëson është se tensioni po rritet përsëri. Numri i provokimeve po rritet. Komuniteti ndërkombëtar është ende i heshtur", ka deklaruar Brnabiq në emisionin "Hit Tweet" në TV Pink.

Ajo paralajmëroi se Bashkësia e Komunave Serbe ka 10 vite që po pret formimin, të cilin Prishtina po e shmang me çdo kusht.

“E kam të lehtë nga Beogradi të them “njerëz, jini të qetë”, dhe është tjetër gjë që i keqtrajtoni njerëzit çdo ditë, se u vidhni tokën, se ndërtoni baza, se keni një makinë të djegur ndaj së cilës reagojnë të gjithë dhe se nuk ka asnjë reagim për të gjitha këto”, tha Brnabiq.

Ajo shtoi se presidenti i Serbisë, Aleksandar Vuçiq, po lufton për paqen dhe për këtë arsye është cak i sulmeve.