Drecun: Çdo destabilizim i Serbisë e bën të pamundur ndihmën për serbët në Kosovë

Kryetari i Komisionit Parlamentar për Mbrojtje dhe Punë të Brendshme, Millovan Drecun, tha sot se çdo destabilizim i Serbisë, si dhe çdo pengesë e zhvillimit ekonomik, e pengon shtetin të ndihmojë maksimalisht serbët në Kosovë, raporton RTV.

"Nëse dikush pengon zhvillimin ekonomik, zvogëlon fluksin e investimeve, krijimin e vendeve të reja të punës, shkakton dëme financiare, atëherë ka më pak para në buxhet. Kur ka më pak para në buxhet, atëherë keni më pak mjete për të ndihmuar, ndër të tjera, popullin serb në Kosovë dhe Metohi", tha Drecun për Tanjug.

Duke folur për lëvizjen e një grupi serbësh nga Kosova, të cilët kanë ecur drejt Novi Sadit që nga 29 tetori në mbështetje të vendit dhe Presidentit Aleksandar Vuçiq, Drecun deklaroi se ata bënë të gjitha përpjekjet mendore dhe fizike për të duruar ecjen, duke treguar se sa shumë kujdesen për Serbinë.

"Ata nuk ecën para kamerave si disa, si këta bllokues, dhe pastaj të ulen në furgonë dhe të ngasin makina. Ata me të vërtetë shkuan në këmbë dhe i duruan të gjitha këto, sepse kjo tregon se sa shumë u intereson shteti i Serbisë. Sepse ata thanë qartë se pa shtetin e Serbisë, pa ndihmën e shtetit të tyre, nuk mund të mbijetojnë", tha Drecun.