Due dënoi vrasjen e Arlinda Zekajt: Çdo thirrje për ndihmë duhet të merret seriozisht

Shefi i UNMIK-ut, Peter Due, dënoi ashpër vrasjen e Arlinda Zekajt, mbrëmë në Vitomiricë të Pejës, duke theksuar se ky rast nxjerr në pah pasojat shkatërruese të dhunës me bazë gjinore dhe nevojën urgjente që çdo thirrje për ndihmë të merret seriozisht.

Due i shprehu ngushëllimet e sinqerta familjes së Arlinda Zekajt, duke theksuar se bëhet fjalë për vrasjen e dytë të një gruaje në Kosovë brenda pak më shumë se dy javësh dhe të tetën që nga fillimi i këtij viti.

„Kjo vrasje brutale, vrasja e dytë e një gruaje në Kosovë brenda pak më shumë se dy javësh dhe e teta këtë vit, nxjerr në pah pasojat shkatërruese të dhunës me bazë gjinore dhe nevojën urgjente që çdo thirrje për ndihmë të merret seriozisht. Dhuna ndaj grave nuk duhet të tolerohet kurrë“, deklaroi Due.

Shefi i UNMIK-ut bëri thirrje për një hetim të plotë dhe përcaktimin e përgjegjësisë në përputhje me sundimin e ligjit.

Ai theksoi se institucionet dhe shoqëria kanë përgjegjësi të përbashkët për parandalimin e dhunës me bazë gjinore, mbrojtjen e grave dhe vajzave, si dhe sigurimin e qasjes në kohë në shërbime efektive të mbrojtjes dhe mbështetjes.

Due vuri në dukje gjithashtu rëndësinë e luftimit të stereotipave të dëmshëm gjinorë, promovimit të barazisë dhe respektit të ndërsjellë, si dhe forcimit të aktiviteteve parandaluese përmes ndërgjegjësimit të synuar dhe edukimit.

Arlinda Zekaj (49) u vra të dielën në mbrëmje, ndërsa kunati i saj, i dyshuar për kryerjen e vrasjes, ndodhet në arrati dhe është në kërkim, njoftoi Policia e Kosovës. Ndërkohë, prokuroria njoftoi se viktima, tri ditë para vrasjes, kishte vënë në dukje lëshimet e institucioneve në rastin e saj.