Gjuriq: Sulmi i policisë së Kurtit në Kryqin e Kuq në Zubin Potok është shkelje serioze e normave ndërkombëtare

Ministri i Punëve të Jashtme të Serbisë, Marko Gjuriq, reagoi ndaj hyrjes së sotme të Policisë së Kosovës në ambientet e Kryqit të Kuq të Kosovës dhe Metohisë pranë liqenit të Gazivodës, në komunën Zubin Potok, duke e cilësuar si një akt të papranueshëm dhe provokues që përbën shkelje serioze të normave dhe konventave ndërkombëtare.

„Në një shembull alarmues të mosrespektimit të ligjit, pjesëtarë të armatosur të policisë së zotit Kurti kanë hyrë sot në ambientet e Kryqit të Kuq të Kosovës dhe Metohisë pranë liqenit të Gazivodës, në komunën Zubin Potok. Ky veprim i pajustifikueshëm dhe jashtëzakonisht provokues kundër shërbimeve kyçe për popullin serb në këtë krahinë nuk është vetëm shkelje e rëndë e statusit të mbrojtur të një institucioni humanitar, por gjithashtu shkelje serioze e normave dhe konventave ndërkombëtare“, ka shkruar Gjuriq në një postim në platformën “X”.

Ministri ka kërkuar që bashkësia ndërkombëtare të reagojë dhe të kërkojë përgjegjësi të plotë nga ata që qëndrojnë prapa këtij „sulmi ndaj dinjitetit njerëzor dhe humanitetit“.

„Duke e dënuar ashpër edhe një incident tjetër në modelin gjithnjë e më të shpeshtë të presionit të qëllimshëm dhe frikësimit të serbëve në Kosovë dhe Metohi, i bëj thirrje bashkësisë ndërkombëtare, organizatave përkatëse dhe partnerëve tanë që ta dënojnë qartë këtë sulm ndaj dinjitetit njerëzor dhe humanitetit, si dhe të kërkojnë përgjegjësi të plotë nga ata që janë përgjegjës për këtë veprim“, ka shkruar Gjuriq.