Jovanoviq me fon Beckerath: Masat e paralajmëruara të Prishtinës e vështirësojnë edhe më tej jetën e serbëve

Sekretarja shtetërore në Ministrinë e Punëve të Jashtme të Republikës së Serbisë, Nevena Jovanoviq, zhvilloi sot një takim me shefin e Delegacionit të Bashkimit Evropian në Serbi, Andreas von Beckerath, të cilit ia tërhoqi vëmendjen për masat dhe zgjidhjet rregullatore të paralajmëruara nga Prishtina, duke paralajmëruar se ato e vështirësojnë edhe më tej jetën e përditshme të serbëve dhe ndikojnë negativisht në realizimin e të drejtave të tyre themelore, përfshirë të drejtën për punë dhe lirinë e lëvizjes.

Jovanoviq e informoi bashkëbiseduesin për situatën aktuale në Kosovë, duke theksuar sfidat e theksuara të sigurisë dhe institucionale me të cilat përballet popullsia serbe.

Ajo theksoi rëndësinë e angazhimit të shtuar të Bashkimi Evropian me qëllim ruajtjen e paqes dhe stabilitetit, si dhe krijimin e kushteve për vazhdimin e dialogut, thuhet në njoftimin e Ministrisë së Punëve të Jashtme të Serbisë.

Gjatë një bisede të hapur dhe konstruktive, u shqyrtuan çështjet kyçe në lidhje me procesin e integrimeve evropiane të Serbisë, dialogun ndërmjet Beogradit dhe Prishtinës, si dhe rrethanat më të gjera rajonale dhe ndërkombëtare me rëndësi për sigurinë dhe stabilitetin evropian.

Bashkëbiseduesit ranë dakord se në periudhën e ardhshme është e nevojshme të intensifikohen më tej aktivitetet reformuese për përshpejtimin e procesit të anëtarësimit, me vlerësimin e përbashkët se integrimi i rajonit në Bashkimin Evropian ka rëndësi thelbësore për stabilitetin dhe prosperitetin e të gjithë rajonit.

Jovanoviq nënvizoi se anëtarësimi në BE përfaqëson përcaktim strategjik dhe prioritet të politikës së jashtme të Serbisë, dhe se për këtë qëllim është miratuar një strukturë e re organizative negociuese dhe është formuar Ekipi Operativ për procesin e anëtarësimit në Bashkimin Evropian, me detyrë të sigurojë udhëzime strategjike, koordinim politik dhe zgjidhje në kohë të çështjeve me rëndësi për përparimin e negociatave, shtohet në njoftim.