Kostiq: Heqja e paralajmëruar e sanksioneve ndaj Kosovës sinjal pozitiv për Prishtinën

Bashkëpunëtori i iniciativës “Rruga e re e tretë”, Mijat Kostiq, ka vlerësuar për Kosovo online se Bashkimi Evropian nuk është në pozitë të zgjedhë anë kur bëhet fjalë për marrëdhëniet mes Beogradit dhe Prishtinës. Ai theksoi se heqja e paralajmëruar e sanksioneve evropiane ndaj Kosovës mund të interpretohet si dërgim i sinjaleve pozitive në vazhdimin e procesit të integrimeve evropiane.

Sipas Kostiqit, gjithçka që doli dje në rezolutën përfundimtare të Samitit BE–Ballkani Perëndimor në Bruksel tregon se Brukseli është zgjuar sa i përket rajonit.

“Ndoshta tani është vënë pak më shumë fokus në rajon sesa në vitet dhe dekadat e mëparshme. Arsyeja kryesore për këtë është, natyrisht, konsolidimi i të gjithë Bashkimit Evropian, veçanërisht në aspektin gjeopolitik, në një moment kur flitet gjithnjë e më shumë për konfrontim me Rusinë. Madje, gjithnjë e më shumë liderë evropianë flasin hapur për mundësinë e një konflikti të drejtpërdrejtë mes Rusisë dhe vendeve evropiane. Në këtë kontekst, Ballkani Perëndimor është i rëndësishëm jo vetëm si hapësirë ekonomike për të kompletuar tregun e BE-së, por edhe si hapësirë gjeopolitike për ta rrumbullakuar territorialisht Unionin dhe për të parandaluar që vendet e Ballkanit Perëndimor të afrohen më shumë me Rusinë”, deklaroi Kostiq.

Ai shtoi se një nga fokuset e Samitit ishte politika e përbashkët e sigurisë dhe e jashtme.

“Shohim se një ofensivë diplomatike pak më proaktive e tregon këtë. Kjo shihet edhe nga ajo që është shkruar në deklaratën e përbashkët përfundimtare: fokusi është te politika e përbashkët e jashtme dhe e sigurisë, që sigurisht lidhet me qëndrimin ndaj Rusisë, dhe natyrisht me gjithçka tjetër që ka të bëjë me tregun e përbashkët dhe një proces të përshpejtuar të integrimit në treg. E gjitha kjo është në hijen e momentit gjeopolitik dhe të sigurisë”, tha bashkëbiseduesi ynë.

I pyetur nëse heqja e sanksioneve ndaj Kosovës, e paralajmëruar dje nga presidentja Vjosa Osmani, paraqet një shtysë për Kurtin dhe nëse BE-ja ka zgjedhur kështu anën e saj, Kostiq thekson se Brukseli nuk është aspak në pozitë për të zgjedhur anë.

“Ata e shohin marrëdhënien mes Beogradit dhe Prishtinës si diçka që duhet të normalizohet në baza bilaterale, ashtu siç e sheh Bashkimi Evropian. Në thelb, ata vazhdimisht përsërisin të njëjtat gjëra: se mbështesin dialogun, se mbështesin integrimin në rajon. Prandaj edhe kjo heqje e sanksioneve mund të shihet si një formë dërgimi të sinjaleve pozitive dhe si një mënyrë për të inkurajuar Kosovën dhe Ballkanin Perëndimor në përgjithësi, duke dërguar mesazhin se do të ketë mbështetje për një integrim të përshpejtuar”, tha Kostiq.

Ai bëri edhe një paralelizëm mes deklaratave të Antoni Koshtës dhe Ursula von der Leyen për Serbinë dhe vlerësoi se, krahasuar me rezolutën e Parlamentit Evropian, ato janë më pajtuese.

“Përfaqësuesit e Komisionit Evropian kanë një qasje shumë më pozitive ndaj Serbisë sesa Parlamenti Evropian. Kjo mund të jetë pjesë e një ofensive ekzekutive diplomatike, përmes së cilës ata përpiqen t’u japin një feedback pozitiv vendeve të Ballkanit Perëndimor, për t’i mbajtur ato në këtë kurs dhe për të dërguar një mesazh politik se Bashkimi Evropian tani është më i gatshëm për zgjerim sesa ishte disa vite më parë. Për ta përmbyllur, nuk do të thosha se bëhet fjalë përanshmëri, por më tepër për një formë veprimi diplomatik që synon ta inkurajojë palën tjetër të vazhdojë me reformat brenda sistemit të vet dhe me procesin e integrimeve evropiane”, përfundoi Kostiq.