Kraus dhe Tufegxhiq: Në Vjenë nuk ka vend për glorifikimin e UÇK-së dhe simbolet e “Shqipërisë së Madhe”

Fantazitë nacionaliste territoriale dhe glorifikimi i grupeve të armatosura nuk kanë vend në Vjenë, deklaruan kreu i grupit parlamentar të Partisë së Lirisë (FPÖ) në Kuvendin e Vjenës, Maximilian Krauss, dhe deputeti Ilija Tufegxhiq, lidhur me protestën e djeshme të diasporës shqiptare në kryeqytetin e Austrisë për shkak të aktgjykimit ndaj udhëheqësve të UÇK-së.

“Liria e tubimit është një vlerë e çmuar. Megjithatë, ajo që ne e kundërshtojmë me vendosmëri është glorifikimi i simboleve të UÇK-së, përdorimi i simboleve që përfaqësojnë të ashtuquajturën ‘Shqipëri të Madhe’ dhe brohoritja e parullave nacionaliste përkatëse në qendër të Vjenës”, thanë Krauss dhe Tufegxhiq në një deklaratë.

Ata kritikuan veçanërisht faktin se gjatë tubimit në Heldenplatz, krahas flamujve shqiptarë dhe të Kosovës, ishin ekspozuar edhe flamuj të UÇK-së dhe flamuj me portretet e ish-udhëheqësve të UÇK-së, të cilët janë dënuar në Hagë.

“Sipas raportimeve të mediave, mund të shiheshin edhe flamuj me motivin e ‘Shqipërisë së Madhe’, ndërsa u dëgjuan edhe parulla. Fantazitë nacionaliste territoriale dhe glorifikimi i grupeve të armatosura nuk kanë vend në Vjenë. Çdokush që proteston në Austri ka të drejtë të kritikojë një aktgjykim gjyqësor. Megjithatë, kjo e drejtë përfundon aty ku frikësohen grupet e tjera etnike, glorifikohen konfliktet historike ose përhapen mesazhe ekstremiste dhe irredentiste”, deklaruan dy deputetët e Partisë së Lirisë së Austrisë.

Ata theksuan se një aktgjykim gjyqësor mund të kritikohet, por se viktimat e krimeve të luftës nuk duhet të përqeshen apo të harrohen.

“Pikërisht për këtë arsye presim që të gjitha forcat politike dhe shoqërore në Vjenë të distancohen qartë nga glorifikimi i dhunës dhe pretendimet fantastike territoriale. Vjena nuk duhet të bëhet skenë e konflikteve etnike të importuara. Çdokush që jeton dhe proteston këtu duhet të jetë në gjendje ta shprehë lirshëm mendimin e tij – por njëkohësisht duhet të respektohen rendi juridik demokratik, dinjiteti njerëzor dhe bashkëjetesa paqësore e të gjithë banorëve të Vjenës”, theksuan Krauss dhe Tufegxhiq.

Shqiptarët nga Austria u mblodhën dje në qendër të Vjenës për të shprehur protestën e tyre ndaj aktgjykimit të Dhomave të Specializuara në Hagë ndaj katër udhëheqësve të UÇK-së.

Në Heldenplatz, ndërmjet selisë së OSBE-së dhe ndërtesës së Qeverisë së Austrisë dhe Presidentit të Austrisë, dominonin flamujt shqiptarë dhe të UÇK-së, si dhe flamujt e Kosovës dhe ata me portretet e Hashim Thaçit, Kadri Veselit, Jakup Krasniqit dhe Rexhep Selimit, por edhe të themeluesit të UÇK-së, Adem Jasharit. Ishin ekspozuar edhe flamuj të “Shqipërisë së Madhe”, ndërsa të tubuarit këndonin për “Shqipërinë e Madhe nga Tirana deri në Bujanoc”.

Hashim Thaçi dhe Jakup Krasniqi u dënuan më 16 shtator, në shkallë të parë, me nga 25 vjet burg secili për krime lufte. Kadri Veseli u dënua me 18 vjet, ndërsa Rexhep Selimi me 13 vjet burg.

Trupi gjykues i shpalli fajtorë Hashim Thaçin, Jakup Krasniqin, Rexhep Selimin dhe Kadri Veselin për krime lufte të kryera ndaj civilëve dhe personave që nuk merrnin pjesë aktive në luftime. Sipas vendimit të trupit gjykues, ata janë fajtorë për krimin e luftës të privimit arbitrar nga liria të 385 personave, trajtimit mizor të 49 personave, torturimit të 303 personave dhe krimin e luftës të vrasjes së 96 personave.