Shqiptarët protestojnë në Vjenë: Nuk pranojmë vendimin e Këshillave të Specializuara

Shqiptarët nga Austria janë tubuar sot në qendër të Vjenës për të protestuar ndaj vendimit të Këshillave të Specializuara në Hagë ndaj katër udhëheqësve të UÇK.

Protesta u mbajt në Sheshin Helden, mes selisë së OSBE dhe godinës së qeverisë dhe presidentit austriak.

Të pranishmit mbanin flamuj shqiptarë dhe të UÇK, si dhe flamuj të Kosovës dhe pankarta me fotografitë e Hashim Thaçit, Kadri Veselit, Jakup Krasniqit e Rexhep Selimit, si dhe të themeluesit të UÇK Adem Jasharit.

Veç kësaj, mund të viheshin re flamuj të "Shqipërisë së Madhe" dhe të dëgjoheshin këngë që flisnin për "Shqipërinë e Madhe nga Tirana në Bujanovc".

Mes të pranishmëve ishte dhe i afërmi i Hashim Thaçit, Idriz Thaçi.

Në tubim folën përfaqësues të shoqatave të Kosovës në Vjenë, si dhe disa veteranë, të cilët thanë se shqiptarët nuk e pranojnë vendimin e Këshillave të Specializuara.

Ata deklaruan se "UÇK nuk është organizatë kriminale" dhe se "lufta që ajo zhvilloi nuk mund të trajtohet si e tillë".