Krihbaum: Nevojitet ndryshim i metodologjisë në procesin e anëtarësimit në BE

Ministri gjerman për Evropën, Ginter Krihbaum, theksoi se nevojitet një ndryshim i metodologjisë në procesin e anëtarësimit në Bashkimin Evropian dhe nënvizoi se nuk bëhet fjalë për asnjë shtyrje, por për arritje më efikase të qëllimit, që është anëtarësimi në BE.

Krihbaum, në një konferencë për media me ministren austriake për çështje evropiane, Klaudia Bauer, në Vjenë, vlerësoi se hapja e negociatave të anëtarësimit me Moldavinë dhe Ukrainën është një sinjal i rëndësishëm dhe se ky vendim forcon besueshmërinë e procesit të zgjerimit.

“Jam plotësisht i bindur se na nevojitet një ndryshim i të ashtuquajturës metodologji. Kjo tingëllon disi e ndërlikuar, por në të kaluarën, e deri më sot, procesi i anëtarësimit në BE ka qenë i organizuar si një lloj gare në kërcim së larti. Shufra nuk është asgjë tjetër veçse acquis communautaire i BE-së, që do të thotë të gjitha ligjet, rregulloret, direktivat dhe aktet e deleguara. Më parë kjo shufër ishte vendosur në 1.5 metra. Megjithatë, edhe acquis-i ka ndryshuar. Ai nuk mund të krahasohet më me atë që ishte pesë, dhjetë apo njëzet vjet më parë. Mjafton të mendoni për mbrojtjen e mjedisit, mbrojtjen e konsumatorit dhe shumë rregullore e çështje të tjera. Sot ajo shufër është në dy metra”, shpjegoi ministri gjerman.

Ai theksoi se për vendet që duhet ta “kapërcejnë” atë shufër, edhe metri e gjysmë i mëparshëm ishte tepër i lartë.

“Prandaj ne angazhohemi për një zgjerim gradual dhe, për të qenë plotësisht i qartë, destinacioni ynë përfundimtar mbetet anëtarësimi i plotë në Bashkimin Evropian. Nuk bëhet fjalë për asnjë shtyrje, por për arritjen më efikase të këtij qëllimi, për gjetjen e një rruge më të mirë drejt tij”, nënvizoi Krihbaum.

Ai tha se Gjermania dëshiron të promovojë një qasje të tillë brenda BE-së, sepse është e nevojshme të ndërtohet një besueshmëri më e madhe.

“Kur procesi i anëtarësimit zgjat dhjetë ose më shumë vjet, njerëzit në vendet që janë në rrugën evropiane humbasin besimin. Ata nuk besojnë më se anëtarësimi është i arritshëm. Pikërisht këtë ne po mbrojmë me këtë qasje”, theksoi Krihbaum.

Bauer dhe Krihbaum u ndalën edhe te propozimi për buxhetin e BE-së, duke vlerësuar se nevojitet një buxhet për të ardhmen, ndërsa propozimi aktual, me vetëm dy për qind kursime, siç theksoi ministrja austriake, është “thjesht kozmetikë”.

Bauer nënvizoi se vendet e BE-së janë ende larg një kompromisi lidhur me buxhetin.

“Barrat duhet të shpërndahen në mënyrë të barabartë. Nuk bëhet fjalë për dobësimin e Evropës, por ne duam të përcaktohen prioritete të qarta”, theksoi ajo.

Krihbaum vuri në dukje se nuk dihet se çfarë do të ndodhë në vitin 2027, kur në Francë dhe Poloni do të mbahen zgjedhje.

Ai tha se bllokadat brenda BE-së nuk janë të dëshirueshme, por paralajmëroi se nuk mund të përjashtohet mundësia që në Pallatin Elysee të vendoset një kandidat që nuk është proevropian.

Bashkëbiseduesit e Kosovo online në analizën e djeshme vlerësuan se sfidat e sigurisë dhe uniteti më i madh brenda Unionit kanë nxitur diskutimet për një model të ri të zgjerimit. Në të njëjtën kohë, ata paralajmëruan se mbetet e hapur çështja nëse një koncept i tillë do të marrë mbështetje të mjaftueshme brenda BE-së dhe si do të zbatohej në praktikë.