Lama: Askush në BE, as Franca, nuk dëshiron “dhimbje koke” për shkak të Ballkanit Perëndimor

Analistja nga Prishtina, Alma Lama, ka deklaruar për Kosovo online se turbulencat politike në Francë reflektohen edhe në politikën e jashtme të këtij vendi, por se Ballkani Perëndimor dhe çështja e dialogut Beograd–Prishtinë aktualisht nuk janë prioritet as për Brukselin, as për Parisin. Megjithatë, stabiliteti politik dhe siguria në këtë rajon mbeten në krye të agjendës së tyre, sepse nuk duan “dhimbje koke”.

„Nuk besoj se Ballkani Perëndimor është aktualisht prioriteti më i lartë për Francën apo për Bashkimin Evropian. Fokusi kryesor është siguria, lufta në Ukrainë, konfliktet si ai në Gaza dhe marrëdhëniet më të gjera ndërkombëtare, ku po ndodhin ndryshime të mëdha gjeopolitike. Megjithatë, Evropa po ndjek edhe dialogun mes Beogradit dhe Prishtinës. Kriza e brendshme politike në Serbi dhe Kosovë nuk i shkon në favor këtij procesi“, deklaroi Lama për Kosovo online.

Ajo shpjegon se në Kosovë ende nuk është formuar qeveria dhe nuk është konstituar parlamenti, ndërsa situata e ngjashme është edhe në Serbi, ku “mbizotëron një paqëndrueshmëri politike e nxitur nga protestat”.

„Dialogu nuk paraqet prioritet as për vendet e rajonit, as për Brukselin. Sigurisht, stabiliteti politik dhe siguria mbeten në krye të agjendës – askush nuk dëshiron sfida të reja të sigurisë apo dhimbje koke shtesë në rajon“, theksoi Lama.

Duke komentuar krizën politike në Francë, e cila kulmoi me shkarkimin e kryeministrit, Lama tha se ky vend po kalon përmes një “turbulence politike” që reflektohet edhe në politikën e jashtme.

„Franca, si një nga shtetet dhe aktorët kryesorë në Bashkimin Evropian, po kalon përmes një turbulence të brendshme politike që reflektohet edhe në politikën e jashtme, para së gjithash sepse kjo krizë ka ardhur si rezultat i problemeve buxhetore. Nga njëra anë, autoritetet dëshironin të ulnin disa shpenzime, ndërsa nga ana tjetër të rrisnin buxhetin për mbrojtjen“, shpjegon analistja.

Lama thotë se çështja e sigurisë është bërë thelbësore për të gjithë BE-në.

“Ky presion po rritet për shkak të luftës në Ukrainë dhe Franca dhe Presidenti (Emmanuel) Macron po përballen me vështirësi të brendshme. Megjithatë, besoj se Macron nuk është për herë të parë në një situatë të tillë. Ai tashmë kishte arritur të kapërcejë kriza të ngjashme më parë dhe luajti një rol të rëndësishëm në formësimin e politikës së jashtme franceze. Prandaj nuk e shikoj me pesimizëm të madh se si Franca do të vazhdojë politikën e saj të jashtme, veçanërisht në lidhje me çështjen e Ukrainës”, konsideron Lama.

Ajo është e bindur se pavarësisht faktit se e gjithë situata "duket shqetësuese", presidenti francez dhe udhëheqës të tjerë evropianë do të "këmbëngulin në çështjen e sigurisë".

"E gjithë Evropa, me mbështetjen e Mbretërisë së Bashkuar, po punon për të rritur alokimet për armatime. Ky mund të mos jetë një lajm i mirë në kontekstin e garës globale të armatimeve, por, sipas shumë njerëzve, është i nevojshëm. Prandaj, nuk besoj se roli i Francës në skenën ndërkombëtare do të zvogëlohet", përfundoi Lama.