Lista Serbe: Afro dhjetë familje serbe në fshatin Hodonoc janë sulmuar nga piromanët

Lista Serbe ka bërë të ditur se për herë të dytë, brenda një periudhe të shkurtër kohore, afro dhjetë familje serbe në fshatin Hodonoc të Komunës së Dardanës janë sulmuar nga piromanët dhe shtoi se mosndëshkimi i atyre që janë përgjegjës për sulmin ndaj serbëve dhe dhuna e hapur institucionale janë terren pjellor për ekstremistët të cilët shqetësohen nga numri i vogël i serbëve në Hodonoc.

“Mbrëmë është djegur hambari i familjes Millenkoviqit me balime bari dhe mjete bujqësore, të cilat sigurojnë mbijetesën e kësaj ferme familjare në tokën e tyre. Frikësimi i familjeve të ndershme dhe punëtore serbe si kjo është pasojë e intolerancës së drejtpërdrejtë dhe konfrontimit publik të regjimit të Albin Kurtit me popullin serb në Kosovë dhe Metohi”, thuhet në deklaratë.

Është shtuar se është fakt i tmerrshëm që asnjë nga përfaqësuesit ndërkombëtarë nuk ka reaguar ndaj sulmeve të vazhdueshme ndaj serbëve në jug të Ibrit.

“Regjimi i Albin Kurtit, duke krijuar kaos me vendimet e tij antiserbe, arriti të largojë vëmendjen e opinionit ndërkombëtar nga sulmet e përditshme me motive etnike ndaj qytetarëve tanë. Dhe ky sulm, si të gjithë të mëparshmit, nuk janë as raste të rastësishme dhe as unike, por qartësisht pjesë e një plani serioz dhe gjithëpërfshirës për dëbimin e popullit serb nga vatrat e tij shekullore”, theksohet.

Siç thonë ata, paqja është vlera më e madhe, e cila duhet “ruajtur dhe mbrojtur nga sulmet e Albin Kurtit”.

“Por nuk ka paqe kur populli serb persekutohet, kur ndalohet dinari serb, hiqen rrogat, pensionet, bursat dhe përfitimet sociale, ose kur sulmohen ata pak serbë që thjesht duan të jetojnë në tokën e tyre”, thonë nga Lista Serbe.