Lista Serbe dënoi aktgjykimin e përsëritur ndaj Dushko Arsiqit

Lista Serbe dënoi ashpër vendimin e sotëm të Gjykatës Themelore në Prishtinë, me të cilin Dushko Arsiq nga Matiçani në rrethinën e Prishtinës u dënua sërish me 13 vjet burg nën akuzat për krime të pretenduara lufte nga viti 1999, edhe pse një aktgjykim i tillë ishte shfuqizuar më herët nga Gjykata e Apelit dhe ishte kthyer për rishqyrtim.

“Ky aktgjykim i trupit gjykues, i përbërë ekskluzivisht nga gjyqtarë të nacionalitetit shqiptar, paraqet edhe një tregues të praktikës së thellë të padrejtë dhe të motivuar etnikisht të gjyqësorit në institucionet në Prishtinë, të cilat në mënyrë sistematike kanë problem me trajtimin objektiv dhe të drejtë ndaj serbëve në Kosovë dhe Metohi, e veçanërisht ndaj serbëve si Arsiqi që nuk ka dashur ta shesë pronën e tij”, thuhet në njoftim.
Lista Serbe vlerëson se në asnjë moment nuk është vërtetuar në mënyrë të padiskutueshme fajësia e Arsiqit.
“Në asnjë moment gjatë këtij procesi të gjatë, që nga arrestimi i Arsiqit në shtator 2021 në pikën administrative Jarinjë dhe që nga qëndrimi i tij në paraburgim në Podujevë, nuk është arritur një vërtetim i besueshëm i fakteve që do të dëshmonin fajësinë e tij. Dëshmitë ekzistuese dhe mbrojtja tregojnë qartë se nuk ka prova të drejtpërdrejta dhe të pakontestueshme që e lidhin zotin Arsiq me veprimet konkrete që i ngarkohen”, theksohet në njoftim.
Lista Serbe konsideron se në këtë mënyrë vazhdon një varg i gjatë aktgjykimesh ku bashkëkryerja në krime përgjithësohet, në vend që për çdo veprim dhe provë individuale të përcaktohet përgjegjësia personale. Sipas vlerësimit të Listës Serbe, kjo jo vetëm që minon sigurinë juridike dhe besimin në sistemin e drejtësisë, por kontribuon edhe në ndjenjën e mëtejshme të frikës, pabarazisë dhe diskriminimit të serbëve.
“Për këtë arsye, kërkojmë respektimin e të drejtave procedurale dhe materiale të të dyshuarve dhe të akuzuarve pavarësisht përkatësisë kombëtare, angazhohemi për një drejtësi të paanshme, të drejtë dhe transparente për të gjitha komunitetet në Kosovë dhe Metohi, sepse politizimi i drejtësisë vetëm nxit tensione të reja në shoqërinë tonë. Presim që çdo ankesë e mëtejshme dhe mjet juridik i paraparë me ligj të merret në konsideratë nga instancat kompetente, si dhe që bashkësia ndërkombëtare të ketë obligim që, në përputhje me parimet e drejtësisë dhe sundimit të ligjit, ta ndjekë me kujdes dhe ta vlerësojë në mënyrë kritike çdo segment të procesit që mund të ketë pasoja serioze për pozitën e komunitetit serb”, përfundon njoftimi i Listës Serbe lidhur me aktgjykimin e sotëm ndaj Dushko Arsiqit.