Luniq: Anëtarësimi i Kosovës në NATO do të ishte një precedent, por një skenar i tillë nuk duhet përjashtuar

Konsulenti në fushën e gjeopolitikës dhe sigurisë, Nikola Luniq, vlerësoi se do të ishte një precedent për NATO-n nëse, pa përmbushur të gjitha kriteret, Kosova do të pranohej si anëtare e kësaj Aleance, por se një skenar i tillë nuk duhet përjashtuar për shkak të trazirave gjeopolitike.

Duke komentuar pretendimin e ekspertëve amerikanë se Kosova së shpejti mund të bëhet anëtare e NATO-s, Luniq thotë se secili kandidat duhet së pari të përmbushë kritere të qarta.

"Në këtë moment, që një vend të anëtarësohet në NATO, duhet të përmbushë disa kushte. Këto janë kritere politike, ushtarake dhe të sigurisë, përputhshmëria ligjore dhe teknike, pëlqimi i të gjithë anëtarëve të NATO-s. Së fundmi, jo më pak e rëndësishme dhe e vetmja gjë që Prishtina ka në këtë moment është sigurimi i mbështetjes publike në shoqërinë e vet", shpjegon Luniq.

Ai shton se Kosova nuk i plotëson as kriteret themelore - që të jetë anëtare e OKB-së. Një kriter kyç është që nuk njihet nga Kombet e Bashkuara.

"Nëse nuk njihet si vend dhe nëse do të anëtarësohej në NATO në këtë moment, do të ishte një precedent që nuk mendoj se NATO do ta lejojë. Megjithatë, duke pasur parasysh situatën gjeopolitike globale dhe histerinë praktikisht në të gjithë planetin, një skenar i tillë nuk duhet përjashtuar", beson Luniq.

Nga ana tjetër, thekson ai, Kosova ka siguruar mbështetjen e anëtarëve më të fuqishëm të NATO-s, nga SHBA-ja deri te Britania e Madhe.

"Ata po mbështesin që Kosova jo vetëm të përmbushë të gjitha kriteret për krijimin e forcave të veta të armatosura, të cilat do të jenë në vitin 2028, por edhe të jetë partnere e tyre dhe anëtare e NATO-s", beson ky analist.

Kjo ide, specifikon ai, është aktualisht e paarritshme.

"Për momentin, është e paarritshme, por nuk duhet të flemë në gjumin e dimërit dhe të mbajmë kokën në rërë. Mund të arrihet në të ardhmen e parashikueshme", paralajmëron Luniq.

I pyetur se si mund të "shkojë shkurt" Kosova drejt NATO-s, ky analist shpjegon se BE-ja tashmë ka filluar të praktikojë që disa vendime kyçe të mos merren më me konsensus, por me shumicë të kualifikuar.

Ky model, specifikon ai, mund të zbatohet edhe nga NATO, duke pasur parasysh se katër anëtarë të kësaj aleance janë fuqimisht kundër anëtarësimit të Kosovës.

"Kur, në momentin e sotëm të krizës gjeopolitike në botë, një organizatë dëshiron të marrë një lloj vendimi, atëherë konsensusi shmanget dhe vendimet merren me shumicë të kualifikuar. E kemi parë në shembullin e BE-së, dhe nuk ka dyshim se herët a vonë do të jetë e njëjta gjë në NATO. Prandaj, të gjitha ato vende që nuk e kanë njohur dhe nuk do ta njohin Kosovën mund të shmangen në pengimin e anëtarësimit të tyre të plotë. Nuk kam dyshim se ndikimi i vendeve të fuqishme si Uashingtoni, Ankaraja, Londra, në fund Parisi dhe Berlini për ta bërë këtë të ndodhë", thotë Luniq.

Zgjidhja për Serbinë është të "shehë se cili është interesi i saj dhe si ta arrijë atë".

"Nuk është në interesin tonë të qëndrojmë mënjanë dhe të vajtojmë paaftësinë e tyre ose të themi, si Kalimero, se kjo nuk është drejtësi ndërkombëtare. Duhet të bëjmë diçka", specifikoi Luniq.