Macut në Jerevan: Serbia e përkushtuar fort ndaj integrimeve evropiane dhe forcimit të vlerave të përbashkëta

Kryeministri i Serbisë, Gjuro Macut, deklaroi sot në panelin “Forcimi i qëndrueshmërisë demokratike dhe përballja me kërcënimet hibride”, në kuadër të Samitit të Komunitetit Politik Evropian në Jerevan, se Serbia mbetet fuqimisht e përkushtuar ndaj integrimeve evropiane dhe forcimit të vlerave të përbashkëta.

Në panelin e drejtuar nga presidenti i Francës Emanuel Makron, Macut mori pjesë së bashku me sekretarin e përgjithshëm të Këshillit të Evropës Alain Berset, presidenten e Moldavisë Maja Sandu, kryeministrin e Spanjës Pedro Sançez, kryeministrin e Andorrës Havier Espot Zamora dhe anëtarin e Presidencës së Bosnjë dhe Hercegovinës Denis Beqiroviq.

Macut theksoi se Serbia mbetet e përkushtuar ndaj integrimeve evropiane dhe forcimit të vlerave të përbashkëta, si demokracia, sundimi i ligjit dhe siguria kolektive.

“Ajo që ne mbrojmë nuk janë vetëm sistemet, por edhe vlerat që na përcaktojnë si shoqëri demokratike”, tha kryeministri i Serbisë.

Macut theksoi se kërcënimet hibride, si dezinformimi, sulmet kibernetike, presionet ekonomike dhe ndërhyrjet politike, kanë për qëllim jo vetëm dobësimin e shteteve, por edhe minimin e besimit në institucione dhe në proceset demokratike.

Sipas tij, për Serbinë këto sfida nuk janë abstrakte, por realitet, duke pasur parasysh pozicionin e saj gjeopolitik.

“Forcimi i qëndrueshmërisë demokratike nuk është vetëm një qëllim politik, por një domosdoshmëri”, theksoi ai, duke shtuar se këtë e dëshmojnë edhe përpjekjet e Bashkimit Evropian për të luftuar kërcënimet hibride.

Kryeministri i Serbisë nënvizoi se, përveç institucioneve, rol kyç kanë edhe qytetarët, duke theksuar rëndësinë e arsimit, si dhe të edukimit mediatik dhe digjital si mbrojtja më e fortë ndaj dezinformimit.