Martinoviq dhe Mitroviq: Deklarata tendenciale dhe jashtëzakonisht të papërgjegjshme të Sveçles

Presidenti dhe drejtori në detyrë i Shërbimit të Trupit Koordinues të Qeverisë së Republikës së Serbisë për komunat e Preshevës, Bujanocit dhe Medvegjës, Aleksandar Martinoviq dhe Nenad Mitroviq, sot i hodhën poshtë rreptësisht akuzat e bëra nga Ministri i Punëve të Brendshme në Qeverinë Teknike të Kosovës, Xhelal Sveçla, përmes rrjeteve sociale, në lidhje me shkeljen e supozuar të të drejtave të njeriut dhe spastrimin etnik të pjesëtarëve të komunitetit shqiptar në ato komuna.

Siç thuhet në njoftimin e Trupit Koordinues, Serbia mbetet e përkushtuar fuqimisht ndaj politikës së integrimit të plotë të të gjitha komuniteteve, respektimit të të drejtave të njeriut dhe të pakicave dhe ofrimit të mundësive të barabarta për të gjithë qytetarët, pavarësisht nga përkatësia e tyre etnike.

“Në përputhje me rrethanat, në komunat Preshevë, Bujanoc dhe Medvegjë, Ministria e Punëve të Brendshme e Republikës së Serbisë siguron funksionimin e strukturave policore shumëetnike, në të cilat pjsëtarët e komuniteteve serbe, shqiptare dhe rome përfaqësohen në mënyrë të barabartë”, thuhet në njoftim.

Shtohet se Ministria e Punëve të Brendshme në disa raste shpalli konkurse publike për rekrutimin e pjsëtarëve të rinj të policisë, por, për fat të keq, interesi i kandidatëve nga komuniteti shqiptar mbeti shumë i ulët.

“Thirrjet për vendosjen e sanksioneve ndërkombëtare ndaj Republikës së Serbisë, bazuar në akuza të pabazuara për spastrim etnik, janë deklarata të pabaza, tendencioze dhe jashtëzakonisht të papërgjegjshme që mund të kërcënojnë seriozisht paqen dhe besimin ndëretnik në jug të Serbisë qendrore. Deklarata të tilla janë në kundërshtim të plotë me faktet dhe përfaqësojnë një përpjekje për të politizuar çështjet që trajtohen në mënyrë të përgjegjshme, transparente dhe gjithëpërfshirëse në institucionet e Republikës së Serbisë”, thuhet në deklaratë.

Trupi koordinues thekson se në komunat e Preshevës, Bujanocit dhe Medvegjës nuk po ndodh asgjë e ngjashme me atë që po u ndodh serbëve në Kosovë nën regjimin e Albin Kurtit.

"Policia nuk po hap zjarr ndaj civilëve gjatë festave fetare, nuk keqtrajton maturantët dhe nuk shkel të drejtat themelore të njeriut. Asnjë pjsëtar i komunitetit shqiptar në këto komuna nuk i ekspozohet llojit të terrorit që përjetojnë çdo ditë serbët në Kosovë dhe Metohi. Përkundrazi, të drejtat e njeriut respektohen, institucionet bëjnë punën e tyre dhe të gjithë qytetarët gëzojnë lirinë e lëvizjes dhe shprehjes", thuhet në deklaratë.

Në Prishtinë, nga ana tjetër, theksohet se Albin Kurti dhe Sveçla nuk arrijnë ta mbulojnë situatën katastrofike në të cilën ndodhet Kosova, ndërsa pamundësia për të konstituar Kuvendin dëshmon për kaosin e plotë institucional.

“Ndërsa regjimi i Kurtit zhytet në arbitraritet dhe dhunë, Serbia mbetet e përkushtuar ndaj sundimit të ligjit, respektit për të gjithë qytetarët dhe ndërtimit të një shoqërie ku nuk ka vend për diskriminim”, shtuan ata.

Dje në Facebook, Sveçla akuzoi Serbinë për diskriminim ndaj shqiptarëve në komunat e Preshevës, Bujanocit dhe Medvegjës dhe për kryerjen e spastrimit etnik, duke deklaruar, ndër të tjera, se asnjë shqiptar nuk u pranua në konkursin serb për polici në komunat në atë pjesë të Serbisë.