Mijaçiq: Ligjshmëria e vendimeve të qeverisë teknike është e diskutueshme, dhe shumë prej tyre prekin komunitetin serb

Koordinatori i Grupit Punues të Konventës Kombëtare për BE për Kapitullin 35, Dragisha Mijaçiq, tha për Kosovo online se është e diskutueshme ligjshmëria dhe kushtetutshmëria e vendimeve që ka marrë Qeveria e Kosovës në mandat teknik dhe se është e vështirë të thuhet nëse organet e drejtësisë në Kosovë do ta shtrojnë këtë çështje para institucioneve kompetente, veçanërisht në rrethanat politike që aktualisht mbizotërojnë në Kosovë.

Shumë ekspertë pohojnë se qeveria në mandat teknik ka shkelur ligjin duke miratuar disa vendime, ndërsa ndër vendimet e fundit që konsiderohen kontestuese janë ndarja e nga 100 eurove për studentët dhe miratimi i Projektbuxhetit për vitin 2026.

"Fatkeqësisht, deri tani asnjë organ i drejtësisë në Kosovë nuk e ka hapur çështjen e vendimeve të qeverisë teknike. A do të ndodhë kjo, është shumë vështirë të parashikohet, sidomos duke pasur parasysh se nuk ekziston interes politik për të zgjidhur shumë prej këtyre çështjeve, sepse kanë qenë në dëm të komunitetit serb. Shumë vendime të marra nga qeveria teknike kanë prekur komunitetin serb, por kemi parë se kur ishte fjala për vendimin mbi arkëtuesit fiskalë, gjykata reagoi. Gjykata Kushtetuese nuk reagoi në rastin e ndërtimit të dy urave pa dokumentacion të domosdoshëm projektues-teknik dhe pa eksproprijim. Nuk ka reaguar as në shumë raste të tjera," thekson Mijaçiq.

Sa i përket vendimeve që kanë qenë në dëm të komunitetit serb, sipas tij, përfaqësuesit ligjërisht të zgjedhur të Listës Serbe, qoftë në parlamentin e Kosovës ose në kuvendet komunale, para së gjithash në Mitrovicën e Veriut, kanë legjitimitetin të shtrojnë çështjen e kushtetutshmërisë dhe ligjshmërinë e tyre.

"Kur është fjala për vendimet që lidhen me ndërtimin e urave, me siguri pritet që kryetari i ri i Mitrovicës së Veriut të shtrojë një çështje të tillë, ndërsa për vendimet e tjera, këtë mund ta parashtrojnë deputetët e Listës Serbe, dhe jo vetëm ata — këtë mund ta presim edhe nga zoti Nenad Rashiq, nëse ai dëshiron. Por një veprim i tillë duhet të pritet në radhë të parë nga deputetët e Listës Serbe," shton Mijaçiq.