Milliq: Pres përparim pas Brukselit, politika e Kurtit po humbet mbështetjen në Perëndim

Politologu Dimitrije Milliq pret që në takimin e nivelit të lartë në Bruksel në kuadër të dialogut mes Beogradit dhe Prishtinës, që do të mbahet nesër, të ketë përparim sa i përket zgjedhjeve të reja të jashtëzakonshme në katër komuna në veri të Kosovës.

“Situata në veri është më urgjente, ajo ku duhet të presim një progress, në radhë të parë për sa i përket qeverisjes lokale në veri dhe zgjedhjeve të përsëritura ku mund të ketë disa përshkallëzime të reja nëse nuk ka përparim. Ka më shumë gjasa që të ketë përparim, sepse në këtë çështje vendet perëndimore janë më afër pozicioneve të serbëve nga veriu, e më pak në anën e Prishtinës”, tha Milliq për Kosovo online.

Megjithatë, ai tregon se mundësia e ndryshimit të dinamikës nuk duhet të përjashtohet në të ardhmen nëse, për shembull, pala kosovare dëshiron të anëtarësohet në disa organizata ndërkombëtare.

"A do të jetë OKB - ka më pak gjasa, nëse do të jetë ndonjë organizatë tjetër - ka mundësi. Përderisa çështja e veriut është e pazgjidhur, në një farë mënyre, edhe pse nuk u shkon për shtat serbëve në veri, i përshtatet pozitës së Serbisë, sepse politika e zbatuar nga qeveria në Prishtinë definitivisht nuk është diçka që vendet perëndimore mund ta mbështesin. Edhe ato pjesë të shoqërive perëndimore që kanë simpati për Albin Kurtin nuk mund ta mbështesin hapur një politikë të tillë, sepse ajo has në rezistencë në ‘mainstream’ politik”, tha Milliq.