Odaloviq: AKS prioritet në vazhdimin e dialogut, Brukseli të parandaloj terrorin kundër serbëve

Kryetari i Komisionit për Personat e Zhdukur Veljko Odaloviq tha sot se në takimin me të dërguarin special për dialogun midis Beogradit dhe Prishtinës, Peter Sorensen, u këmbëngul që çështja e Asociacionit të Komunave Serbe të jetë prioritet në vazhdimin e dialogut, si dhe se Brukseli u ftua të përdorë autoritetin e tij për të parandaluar terrorin që Albin Kurti po kryen kundër popullit serb dhe institucioneve serbe në Kosovë, raporton RTV.

Odaloviq, i cili mori pjesë në takimin e djeshëm në Bruksel, tha se BE nuk po e zhvillon mirë dialogun midis Beogradit dhe Prishtinës, por se shpreson që Sorensen do të ketë forcën për të futur cilësi të reja dhe për të vendosur drejtime të reja që do të japin rezultate.

Siç tha ai, Sorensen foli edhe me kreun e delegacionit të Prishtinës, Besnik Bislimi, në Bruksel një ditë më parë me qëllim përgatitjen për takimin trepalësh.

"Drejtori i Zyrës për Kosovën dhe Metohinë, Petar Petkoviq, pati dy biseda me Sorensenin, dhe njëra ishte 'tet a tet', ku ata shqyrtuan temat e mundshme për të cilat do të bien dakord", tha Odaloviq për TV Prva.

Ai theksoi se kërkesa thelbësore e Beogradit është që Aociacioni i Komunave Serbe të jetë në tryezën e negociatave dhe se duhet të merret një qëndrim shumë i qartë për këtë temë, duke theksuar se Prishtina është zotuar për formimin e AKS pikërisht në Bruksel.

Odaloviq tha se çështja e personave të zhdukur u diskutua gjithashtu në takim dhe shtoi se përshtypja e tij është se ka njëfarë progresi, si dhe se pret që Grupi Punues për Personat e Zhdukur të vazhdojë të takohet.

"Të kthehemi aty ku ishte katër vjet më parë, në procesin dhe rrugën që dha rezultate të rëndësishme, dhe të fillojmë zgjidhjen e shumë çështjeve të hapura", tha Odaloviq.

Siç thotë ai, në takim, Petkoviq vuri në dukje ngjarjet në Kosovë, kryesisht në veri, dhe kërkoi që Brukseli të përdorë autoritetin dhe forcën e tij për të parandaluar përshkallëzimin e terrorit të Albin Kurtit kundër popullit serb dhe institucioneve serbe.

"Nëse nuk e ndalojnë, nuk e shoh se ku do të jetë fundi. Shoh që prokurorët e Kurtit kanë filluar t'i thirrin njerëz nga Lista Serbe, domethënë njerëz më të shquar në veri të KdheM, duke iu referuar disa ligjeve të tyre dhe përmbysjes së rendit kushtetues... Ky është një sulm i drejtpërdrejtë ndaj përfaqësuesve serbë dhe Listës Serbe", tha Odaloviq.

Ai beson se qëllimi i Kurtit është të neutralizojë dhe shkatërrojë Listën Serbe, e cila bashkon serbët dhe e cila mori shumë mbështetje nga populli serb në Kosovë në zgjedhjet e fundit.

"Qëllimi i tij është që, ndoshta para zgjedhjeve lokale që vijnë në vjeshtë, të përpiqet të krijojë 'përçarje' në unitetin e shkatërruar të serbëve dhe të krijojë bazën për përdorimin e këtij mekanizmi për të sfiduar rrugën drejt formimit të AKS, sepse është e qartë se ai nuk ka ndërmend ta përmbushë këtë, madje e tha këtë publikisht në fushatën parazgjedhore", kujtoi Odaloviq.

Duke folur për përpjekjen për dëbim me forcë të personave të zhvendosur brenda vendit në Leposaviq, Odaloviq tha se vendimi për të dëbuar 17 familje serbe shkaktoi shqetësim serioz dhe theksoi se ishte një tjetër goditje dhe presion mbi serbët në Kosovë.

"Qëllimi i Kurtit është të krijojë pasiguri në komunitetin serb me lëvizje të tilla. Diku ai pushton Shtëpinë e Kulturës, diku ai pushton objektet sportive, objektet sociale, diku postën dhe përpiqet të krijojë pasiguri në çdo segment", tha Odaloviq.