Orlliq: Seanca e Kuvendit për Kosovën në dhjetë ditët e ardhshme, do të jetë i ftuar edhe Vuçiq

Kryetari i Kuvendit të Serbisë, Vlladimir Orlliq, ka thënë sot për Tanjug se së shpejti do të mbahet seanca e Kuvendit për Kosovën dhe Metohinë, ndoshta në dhjetë ditët e ardhshme, raportoi Informeri.

“Do të jetë i ftuar presidenti serb Alleksandar Vuçiq, natyrisht, dhe është e njohur se i është përgjigjur gjithmonë çdo thirrjeje të Kuvendit, se foli hapur për gjithçka dhe iu përgjigj të gjitha pyetjeve dhe vërejtjeve”, tha Orlliq.

Ai deklaroi se do të shihet nëse në seancë do të vijnë ata që kanë kundërshtime për gjithçka.

“Do të shohim nëse do të vijnë fare në seancë ose, si zakonisht, vetëm për të ndalur në sallë për një kohë të shkurtër kur të vijë radha e tyre për kamerën, ata që kanë kundërshtime për gjithçka dhe qartë se nuk janë të interesuar për ndonjë konsultim serioz për temën e Kosovës dhe Metohisë”, ka theksuar Orlliq.

Vuçiq ka thënë mbrëmë se në ditët në vijim do t'i ftojë të gjithë përfaqësuesit e grupeve parlamentare për t'i njohur me detajet e planit evropian për Kosovën, si dhe se do të kërkohet një rol më i rëndësishëm i Parlamentit dhe i Qeverisë.