Pavkoviq: Kryetarët shqiptarë në veri pa ndjeshmëri për problemet e komunitetit serb

Kryetarët etnikë shqiptarë që fituan në zgjedhjet e mbajtura para dy vitesh në komunat në veri të Kosovës nuk kanë treguar ndjeshmëri për komunitetin shumicë në ato zona, që është ai serb, për problemet, dëshirat dhe aspiratat e tyre. Ata kanë vepruar sipas vullnetit të tyre dhe në përputhje me interesat e qeverisë qendrore, ka deklaruar për Kosovo online Millosh Pavkoviq, bashkëpunëtor i Qendrës për Politika Evropiane nga Beogradi.

Ai kujton se zgjedhjet e mbajtura para dy vitesh u kritikuan si të paligjshme për shkak të pjesëmarrjes shumë të ulët, dhe thotë se është dëshmuar se këta kryetarë gjatë mandatit të tyre kanë qenë dukshëm të orientuar kundër komunitetit serb, gjë që është vërtetuar edhe në veprimet konkrete që kanë ndërmarrë.

“Disa nga shembujt janë nënshkrimi i iniciativave për anëtarësim në Bashkësinë e Komunave Shqiptare, pastaj problemi me noterët, pasi që janë emëruar vetëm noterë të përkatësisë etnike shqiptare, si dhe refuzimi për të pranuar iniciativën për mbajtjen e zgjedhjeve të jashtëzakonshme lokale, përkatësisht për shkarkimin e kryetarëve. Të gjitha këto janë gjëra që tregojnë se këta kryetarë nuk e kanë përfaqësuar shpirtin e popullit dhe vullnetin e shumicës, por kanë qenë aty vetëm për të mbushur vakuumin dhe për të irrituar sa më shumë komunitetin serb, sepse nuk kanë pasur asnjë legjitimitet dhe kanë bashkëpunuar ekskluzivisht me qeverinë qendrore, pa marrë parasysh dëshirat dhe kërkesat e komunitetit shumicë që jeton aty”, thekson Pavkoviq.

Duke pasur parasysh se zgjedhjet e reja lokale do të pasojnë në vjeshtë, ai thotë se nëse në to merr pjesë edhe komuniteti serb, me siguri do të ndërrohen kryetarët aktualë dhe do të emërohen të rinj, por problematike është mundësia e tërheqjes së vendimeve që janë marrë gjatë dy viteve të kaluara në katër komuna në veri.

"Supozoj se disa vendime do të mund të tërhiqen, disa jo. Do të ketë rezistencë edhe nga autoritetet qendrore, por kjo është një pyetje për një fazë të mëvonshme kur të zhvillohen zgjedhjet lokale dhe kur të kemi kryetarë të rinj potencialë në këto komuna”, përfundon Pavkoviq.