Pavkoviq: Osmani u përpoq të ngrohë marrëdhëniet midis administratës aktuale amerikane dhe Prishtinës, por dështoi

Milosh Pavkoviq, bashkëpunëtor i Qendrës për Politikë Evropiane nga Beogradi, vlerëson se Presidentja e Kosovës Vjosa Osmani, duke u mbështetur në deklaratat e Presidentit të SHBA-së Donald Trump në lidhje me angazhimin në parandalimin e konflikteve midis Kosovës dhe Serbisë, donte të imponohej si një partnere e mundshme dhe të përpiqej të ngrohë marrëdhëniet midis administratës aktuale amerikane dhe Prishtinës, por se nuk ia doli, sepse fjalët e saj u përballën me rezistencë të ashpër nga Richard Grenell.

"Fokusi nuk ishte nëse kishte vërtet indikacione se do të kishte një konflikt të armatosur në Kosovë, por Osmani donte ta përdorte këtë histori për të krijuar një lloj marrëdhënieje me Shtëpinë e Bardhë. Sigurisht, gjithmonë ekziston mundësia që ajo që është larg publikut të ekzistojë pas kuintave dhe që ne nuk e dimë, por mendoj se fokusi këtu ishte ende një përpjekje për të ndërtuar çdo lloj lidhjeje midis presidentit aktual të Kosovës dhe presidentit të Shteteve të Bashkuara, Donald Trump, mbi atë deklaratë të Trump", tha Pavkoviq për Kosovo online.

Duke komentuar deklaratën e Osmanit se Marrëveshja e Uashingtonit nga viti 2020 është zbatuar, ai thotë se dy ose tre pika nga ajo marrëveshje janë përmbushur, ndërsa një numër më i madh pikash mbeten të pazbatuara.

"Të përfunduarat përfshijnë faktin që Serbia pezulloi fushatën për qënjohjen e Kosovës dhe që Kosova njëkohësisht hoqi dorë nga aplikimet për anëtarësim në organizatat ndërkombëtare për një vit, pastaj njohja e famshme të Kosovës nga Izraeli, si dhe pikën në lidhje me teknologjinë e pasigurt 5G që i takon Huawei. Ajo që nuk u përmbush, dhe ishte vërtet shumë e rëndësishme për procesin e normalizimit, është ndërtimi i hekurudhës Beograd-Prishtinë, Autostrada e Paqes Nish-Prishtinë dhe vendosja e trafikut ajror midis Beogradit dhe Prishtinës. Të gjitha këto gjëra do të kontribuonin në një lloj normalizimi ekonomik në terren, i cili mund të çonte në një normalizim më të gjerë politik", tha Pavkoviq.

Ai deklaron se është e qartë se nga perspektiva e Prishtinës, njohja e Izraelit dhe vazhdimi i fushatës për anëtarësim në organizatat ndërkombëtare janë gjërat më të rëndësishme dhe thelbësore.

“Nga perspektiva e tyre, e gjithë marrëveshja e Uashingtonit është përmbushur nëse është përmbushur, por në thelb shohim se shumë pika nuk janë përmbushur, siç është anëtarësimi në ‘mini Shengenin’ e atëhershëm, pra Ballkanin e Hapur, për të cilin Prishtina u zotua në marrëveshje. E gjithë kjo mund të kishte mundësuar procesin e normalizimit, por tani pas pesë vitesh, askush nuk po flet më për këto gjëra”, thekson Pavkoviq.