Petkoviq me Duen: Shembuj të shumtë të shkeljes së të drejtave themelore njerëzore dhe politike të serbëve në Kosovë dhe Metohi

Drejtori i Zyrës për Kosovën dhe Metohinë, Petar Petkoviq, theksoi sot në bisedë me shefin e UNMIK-ut, Peter Due, se Prishtina, me paralajmërimin e zbatimit të “të ashtuquajturave ligje për të huajt dhe për automjetet”, synon të rrezikojë më tej të drejta të shumta njerëzore të serbëve, dhe se është me rëndësi jetike që UNMIK-u ta trajtojë këtë çështje si prioritare, pasi është vendimtare të ndalen synime të tilla të Prishtinës dhe t’u garantohen serbëve në Kosovë të drejta thelbësore ekzistenciale.

Petkoviq e informoi Duen për shembuj të shumtë të shkeljes së të drejtave themelore njerëzore dhe politike të serbëve në Kosovë, si dhe për veprimet e njëanshme dhe të paligjshme të Prishtinës, njoftoi Zyra për KeM.

Duke i uruar bashkëbiseduesit një mandat të suksesshëm, duke pasur parasysh përvojën e tij të madhe diplomatike dhe njohjen e konsiderueshme të rrethanave në terren, Petkoviq theksoi rëndësinë e veprimit të UNMIK-ut në hapësirën e Kosovës në përputhje me Rezolutën 1244 të Këshillit të Sigurimit të Kombeve të Bashkuara.

Drejtori i Zyrës për KeM shprehu bindjen se UNMIK-u do të vazhdojë që përmes raporteve të tij të flasë në mënyrë konsekuente dhe të përkushtuar për të gjitha shkeljet e të drejtave të popullit serb, të cilat rrezikohen si pasojë e veprimeve pothuajse të përditshme antiserbe dhe eskaluese të Albin Kurtit, me të cilat, siç theksoi ai, minohen paqja dhe stabiliteti në Kosovë.

Ai theksoi se Beogradi merr pjesë në mënyrë të përkushtuar dhe konstruktive në procesin e dialogut me Prishtinën në Bruksel, me qëllim normalizimin e marrëdhënieve dhe zgjidhjen e të gjitha çështjeve të hapura, duke insistuar qartësisht që të ndërmerren hapa konkretë për formimin e Asociacionit të komunave me shumicë serbe, të cilin populli serb e pret prej gati 13 vitesh.

“Fatkeqësisht, Beogradi në anën tjetër të tryezës së negociatave nuk ka një bashkëbisedues të besueshëm dhe të gatshëm për kompromis”, theksoi Petkoviq.

Ai paralajmëroi se “me njoftimin për zbatimin e të ashtuquajturave ligje për të huajt dhe për automjetet, Prishtina synon të rrezikojë më tej të drejta të shumta njerëzore të serbëve, të cilat garantohen edhe nga konventat ndërkombëtare, ndër të tjera të drejtën e lëvizjes së lirë, të drejtën për punë, për jetë familjare, si dhe të drejtat për arsimim dhe trajtim mjekësor”.

Për këtë arsye, theksoi Petkoviq, është me rëndësi jetike që UNMIK-u ta trajtojë këtë çështje si prioritare, pasi është vendimtare të ndalet kjo lloj qasjeje e Prishtinës dhe t’u garantohen serbëve në Kosovë të drejta thelbësore ekzistenciale.

Petkoviq gjithashtu deklaroi se populli serb në Kosovë ka një besim të konsiderueshëm në punën e UNMIK-ut, por pret edhe një dukshmëri dhe prani më të madhe të kësaj misioni në terren, duke përfunduar se komunikimi i ndërsjellë është i paçmueshëm për përmirësimin e pozitës së popullit serb, thuhet në njoftim.