Petkoviq: Plagë e pashërueshme për Osmanin që Vuçiq dallohet me vizionin dhe kujdesin për rajonin

Drejtori i Zyrës për Kosovë dhe Metohi, Petar Petkoviq, deklaroi sot se presidentja e Kosovës, Vjosa Osmani, duke u prononcuar nga Durrësi, edhe një herë ka dëshmuar se për të është plagë e pashërueshme fakti që presidenti i Serbisë, Aleksandar Vuçiq, dallohet ndër liderët e tjerë të rajonit me vizionin, seriozitetin dhe kujdesin e sinqertë për të ardhmen e Ballkanit Perëndimor.

„Osmani, nga perspektiva e saj e kufizuar si e huaj dhe turiste në këto takime, nuk mund të kuptojë kur dikush vepron dhe mendon jashtë kornizës së paranojës ballkanike dhe xhelozisë ndaj të tjerëve, duke treguar përgjegjësi të vërtetë shtetërore ndaj të gjithë rajonit dhe popujve që jetojnë në të“, tha Petkoviq në një komunikatë.

Ai vlerësoi se është e natyrshme që Osmani, si „përfaqësuese e një strukture politike të përkohshme“, e cila sipas tij është përgjegjëse për njërin nga spastrimet etnike më të mëdha në historinë moderne evropiane, nuk ka ndjenjë për interesat kolektive të shteteve dhe popujve të Ballkanit Perëndimor.

Petkoviq shtoi se paraqitjet e Vjosa Osmanit në forume ndërkombëtare janë jo vetëm shfaqje paranoje dhe urrejtjeje të verbër ndaj gjithçkaje serbe, por edhe dëshmi se humbja e ndjenjës për realitetin është bërë sëmundje kolektive e shumë elitave politike, dhe se disa janë të gatshëm ta ndërtojnë të ardhmen mbi gënjeshtra, premisa të gabuara dhe themele të brishta të post-së vërtetës.

Ai theksoi se Prishtina vazhdimisht përpiqet në forume ndërkombëtare të luajë rolin e viktimës, megjithëse është e qartë se viktimat e politikës separatiste të saj nuk janë krijuesit e asaj politike, por rreth një çerek milioni serbë të zhvendosur brenda vendit, si edhe serbët që sot në Kosovë janë viktima të një forme apartejdi që, siç tha, nuk është parë në Evropë pas Luftës së Dytë Botërore.

„Prishtina dhe përfaqësuesit e saj vazhdojnë ta përmbysin realitetin, duke e paraqitur ndryshe nga e vërteta – kështu që krijimi i pakteve të sigurisë, të cilat nuk janë mbrojtëse por agresive dhe të drejtuara kundër Serbisë, paraqitet si nismë paqësore, ndërsa armatosja e paligjshme e separatistëve shqiptarë dhe formimi i njësive ushtarake, në kundërshtim me të drejtën ndërkombëtare, paraqitet si pacifizëm“, tha Petkoviq.

Ai shtoi gjithashtu se "marrëzitë nga repertori i Vjosa Osmanit" nuk mund të çorientojnë dhe mashtrojnë askënd përgjegjës dhe normal.

„Rajoni ynë sot ka një shans për një të ardhme paqësore dhe të begatë pikërisht sepse ende ekzistojnë shtetarë si presidenti Vuçiq, të gatshëm të mos mbyllin sytë para realitetit dhe të quajnë gjërat me emrin e tyre të vërtetë“, përfundoi Petkoviq.

Më herët sot, presidentja e Kosovës, Vjosa Osmani, pas samitit të Procesit Bërdo-Brioni në Durrës, deklaroi se presidenti i Serbisë, Aleksandar Vuçiq, kishte tentuar ta prishte takimin duke u shprehur me arrogancë dhe fyerje.