Qeveria e Serbisë: Ndihma financiare për serbët në burgjet e Kosovës, viktima të persekutimit politik

Qeveria e Serbisë sot ka miratuar një konkluzion me të cilin miratohet masa e pagesës së ndihmës financiare të njëhershme në shumë prej 300 mijë dinarë për personat që ndodhen në burgje dhe paraburgime gjyqësore në Kosovë.

Në njoftimin e Qeverisë së Serbisë, thuhet se këta janë persona kundër të cilëve po zhvillohen procedura të montuara penale për krime që dyshohet se janë kryer gjatë konflikteve të armatosura të viteve 1998-1999. kundër shqiptarëve në territorin e Kosovës, si dhe në procedura të tjera të inskenuara penale të iniciuara me qëllim të persekutimit politik.

“Në këtë mënyrë, do të ofrohet një ndihmë financiare e njëhershme në shumën prej 300,000 dinarësh për personat që, sipas këtyre bazave, ndodhen në burgje dhe njësi të paraburgimit gjyqësor në Kosovë dhe Metohi, sipas të dhënave të Zyrës për Kosovë dhe Metohi”, thuhet në njoftim.

Shtohet se pagesa e kësaj ndihme të njëhershme do të realizohet në kohën më të shkurtër të mundshme.