Qytetarët e Mitrovicës së Veriut për peticionin: Presim që populli të zgjedhë vetë përfaqësuesit e tij

Qytetarët e Mitrovicës së Veriut kanë thënë për Kosovo online se shpresojnë që peticioni për shkarkimin e kryekomunarit të ketë sukses, pas së cilës presin të mbahen zgjedhje në të cilat qytetarët do të zgjedhin përfaqësuesit e tyre.

Boban Dimitrijeviq theksoi se e ka kryer detyrën e tij qytetare dhe shpreson për më të mirën.

“Dikush e ka kërkuar gjithë këtë procedurë me një udhëzim të çuditshëm administrativ, që besoj se nuk është në përputhje me ligjin. Ne e dimë se kryekomunarët e këtyre tri komunave në veri kanë marrë tre deri në katër për qind të votave dhe besojmë se kjo është jolegjitime. Si çdo qytetar i Mitrovicës së Veriut që është në listën e votuesve, kam menduar të vij dhe ta nënshkruaj këtë kërkesë për peticion”, tha Dimitrijeviq.

Një tjetër banor tha se i gjithë aksioni ishte i organizuar mirë dhe se ishte i kënaqur që kishte firmosur peticionin.

“Shpresoj që të ketë një zëvendësim ligjor të kryekomunarit aktual dhe të organizohen disa zgjedhje të ndershme në të ardhmen. Ne dëshirojmë që postin e kryetarit të komunës ta zë një njeri që meriton të zgjidhet nga populli i Mitrovicës, pra qytetarët e veriut të Kosovës. Nuk ka rëndësi nëse është Mitrovica e Veriut, Leposaviqi, Zubin Potoku apo Zveçani, por duhet të bëhet në mënyrë të drejtë dhe të ndershme dhe qytetarët të kenë përfaqësuesin e tyre të vërtetë”, thekson ai.

Dojçin Dançetoviq tha se ka pritshmëri pozitive dhe se shpreson sikurse qytetarët e tjerë që të jetë më mirë pas miratimit të peticionit.

"Deri tani kjo është një gjendje e sëmurë dhe nuk është aspak mirë. Kryekomunarët duhet të jenë tanët, natyrisht, të zgjedhur nga populli, jo të emëruar nga forca", përfundoi Dançetoviq.