Shahini: Kosova do të ketë rrymën më të shtrenjtë në tërë Ballkanin

Kryetari i Aleancës Kosovare të Bizneseve, Agim Shahini, me rastin e paralajmërimit për 15 për qind rritje të çmimit të energjisë elektrike ka thënë se Kosova do të jetë kampione në mbarë Ballkanin me rrymën më të shtrenjtë.

Shahini beson se qytetarët e Kosovës nuk do ta përballojnë dot rritjen e sapo paralajmëruar të energjisë elektrike.

“Është paralajmëruar se do të rritet çmimi i energjisë elektrike për 15 për qind. Ne do të jemi kampionë në të gjithë Ballkanin me energjinë më të shtrenjtë. Rritja e çmimit të energjisë elektrike prek drejtpërdrejt bizneset, qytetarët dhe konsumatorët. Gjatë fushatës zgjedhore gjithmonë premtonin se do të ishte i mirë, por pas kësaj çmimi i energjisë elektrike filloi të rritet nuk do të mund ta përballojë këtë rritje të çmimit, mendoj se është miratuar nga Qeveria”, tha Shahini.

Ai shton se Qeveria e Kosovës nuk ka një strategji se si të dalim nga varfëria.

"Duhet të krijojmë një strategji për të dalë nga kriza. Ne kemi shumë para në buxhet, por nuk po shpenzohen. Qeveria duhet të investojë në projekte infrastrukturore, subvencione për qytetarët, rritjen e numrit të punëtorëve në sipërmarrje, dhe rritjen e pagave. Në atë drejtim do ta ngrinim standardin e jetesës. Siç është tani, ne jemi në krizë dhe do të vazhdojmë të votojmë, nëse qytetarët do të votojnë, nëse do të votojnë se është e bukur kështu, atëherë vazhdojmë tutje”, ka përfunduar Shahini.