Simiq: Serbët i frikësohen nga prania e njësive speciale të Policisë së Kosovës në veri

Nënkryetari i Listës Serbe, Igor Simiq, ka thënë sot se gjendja e Millan Jovanoviqit, i cili mbeti i plagosur të hënën në mbrëmje në afërsi të urës së Bistricës, është stabile, por se ai, si qytetarët e tjerë, ka frikë nga prania e njësive speciale të Policisë së Kosovës në veri të Kosovës, që është, siç tha ai, në kundërshtim me Marrëveshjen e Brukselit, raporton RTV.

Simiq tha për TV Pink se përfaqësuesit politikë të serbëve të Kosovës do të kenë nesër një takim me Presidentin serb Aleksandar Vuçiq, Kryeministren Ana Brnabiq dhe ministrat në Qeverinë e Serbisë dhe se do t'u tregojnë se si jetojnë serbët dhe do të paraqesin gjithçka që po bën regjimi i Prishtinës.

“Në shekullin XXI, në tokën e Evropës, një polic qëlloi një njeri dhe tentoi ta vriste, dhe institucionet e Kosovës donin ta fshiheshin derisa u bë presion nga Drejtori i Zyrës për Kosovë e Metohi, Petar Petkoviq dhe Lista Serbe në terren, ku ne insistuam që të shfaqen pamjet nga kamerat. Aty janë shumë kamera dhe më së miri mund të tregojnë se çfarë ka ndodhur”, tha Simiq.

Ai ka deklaruar se pas takimit me Vuçiqin javën e kaluar, të tjerëve, përfshirë edhe atë, kanë ndodhur gjëra shumë të pakëndshme nga ana e Policisë së Kosovës.

“Të gjitha këto së bashku tregojnë se ata po përpiqen të gjejnë një arsye për të vazhduar represionin ndaj serbëve, për të futur frikën në kockat e tyre dhe për të dëbuar serbët nga veriu ku ata formojnë një mjedis kompakt”, tha Simiq.

Sipas tij, deklarata e djeshme e Ministrit të Punëve të Brendshme të Kosovës, Xhelal Sveçla, tregon se ata duan të relativizojnë veprimet e policëve të Kosovës, ndërsa i plagosuri Jovanoviqi është sjellë me përgjegjësi dhe në deklaratat e tij për media nga shtrati i spitalit, ai nuk ka dashur të akuzojë Policinë e Kosovës, por ka pasur vetëm një dëshirë, të kthehet pranë familjes dhe detyrave të tij.

Simiq tha se pret që forcat ndërkombëtare, të cilave u është dhënë mandati që të kujdesen për sigurinë e të gjithë qytetarëve në Kosovë, të tregojnë përgjegjësi dhe të parandalojnë incidente.

“Serbët nuk kanë nevojë për incidente dhe ne asnjëherë nuk i kemi provokuar. Represioni i regjimit të Kurtit çon në zbatimin e dhunës institucionale dhe ne nuk mund të parashikojmë sjelljen e tyre”, tha Simiq.

Ai përkujtoi se që nga fillimi i vitit në Kosovë kanë ndodhur më shumë se 10 incidente të rënda dhe që nga koha kur Kryeministri Albin Kurti është në pushtet, ka pasur më shumë se 300 sulme me motive etnike ndaj serbëve, pronës së tyre dhe ndaj Kishës Ortodokse Serbe.

Simiq theksoi se serbët po arrestohen pa asnjë arsye dhe keqtrajtohen, duke kujtuar rastin e arrestimit të një mjeku për sulm të supozuar ndaj policëve, i cili u mbajt në paraburgim për 30 ditë.

"Kur një shqiptar sulmoi një polic dhe madje u përpoq ta përmbyste me një automjet, ai u mor në pyetje dhe u lirua. Aq sa për llojin e sistemit në të cilin jetojnë serbët në hapësirën e Kosovës e Metohisë", tha Simiq.