Von der Leyen: E rëndësishme që Kosova të deeskalojë tensionet

Presidentja e Komisionit Evropian, Ursula von der Leyen, e cila sot u takua me presidenten e Kosovës, Vjosa Osmani, dhe kryeministrin në mandat teknik, Albin Kurtin, tha se Bashkimi Evropian mbetet i përkushtuar ndaj një të ardhmeje në të cilën të gjashtë partnerët e Ballkanit Perëndimor janë pjesë e Unionit, prandaj është e rëndësishme që Kosova të vazhdojë të ndërtojë institucione të forta dhe të ulë tensionet.

Von der Leyen gjithashtu theksoi se Kosova duhet të përfundojë hapat e nevojshëm për të përfituar nga Plani i Rritjes.

“Ne mbetemi të përkushtuar ndaj një të ardhmeje në të cilën të gjashtë partnerët e Ballkanit Perëndimor janë pjesë e Bashkimit tonë. Prandaj është e rëndësishme që Kosova të vazhdojë të ndërtojë institucione të forta, të deeskalojë tensionet në vend. Gjithashtu, Kosova duhet të përfundojë hapat e nevojshëm për të përfituar nga Plani i Rritjes,” shkroi Von der Leyen në rrjetin “X”.