Vuçiq: I bëj thirrje opozitës që të dorëzojë nënshkrime për referendum këshillues për shkarkimin tim

Presidenti i Serbisë Aleksandar Vuçiq u bëri thirrje partive opozitare që të dorëzojnë 67 nënshkrime për të mbajtur një referendum këshillues për shkarkimin e tij, pasi OJQ Crta raportoi se shumica dërrmuese e qytetarëve janë pro largimit të tij.

“Crta objektive dhe e paanshme ka bërë të ditur publikun se shumica dërrmuese e qytetarëve janë pro largimit tim. Nuk ka burim më të besueshëm, as për bashkësinë ndërkombëtare dhe as për partitë politike në Serbi, sesa kjo organizatë joqeveritare. Kam luftuar për popullin dhe populli është forca ime. Nëse këto pohime të Crta janë të vërteta, është e pamundur që unë të mbetem president i Serbisë, prandaj partitë opozitare duhet të dorëzojnë vetëm 67 nënshkrime dhe kanë mbi 80, për të mbajtur referendum këshillues për Presidentin e Serbisë“, ka thënë Vuçiq në Instagram.

Ai shtoi se legjitimiteti është gjëja më e rëndësishme në politikë dhe sovraniteti gjithmonë buron nga vullneti i popullit.

“Mendoj se oferta është më se e drejtë dhe është mirë që të gjithë në këtë vend të mos pretendojnë se u interesojnë disa dokumente ndërtimi dhe të vendosin më në fund gjërat në vendin e tyre. Ndryshe nga sa mendohet, unë kurrë nuk kam qenë i interesuar për qeverisjen si të tillë, kam qenë dhe jam i interesuar vetëm për përparimin e Serbisë. Serbia nuk duhet të ndalet! Rroftë Serbia”, ka përfunduar Vuçiq.