Vuçiq: Së shpejti lajme të mira lidhur me tërheqjen e njohjes së pavarësisë së Kosovës

Presidenti i Serbisë, Aleksandar Vuçiq, para nisjes për në Nju Jork në Asamblenë e Përgjithshme të OKB-së, tha se së shpejti mund të priten lajme të mira në lidhje me tërheqjen e njohjes së pavarësisë së Kosovës.

Vuçiq për TV Blic tha se në Nju Jork do të bisedojë me sekretarin amerikan të shtetit Marko Rubio, me presidentin e Këshillit Evropian, Antonio Koshta, por edhe me 22 presidentë e kryeministra të vendeve të ndryshme.

„Mes tyre do të ketë edhe disa liderë afrikanë dhe prisni së shpejti lajme të mira për lidhje me tërheqjen e njohjes së pavarësisë së Kosovës“, theksoi Vuçiq.

Ai tha se shpreson të mund të marrë pjesë në takimin që organizon shefja e diplomacisë evropiane, Kaja Kallas, por në atë kohë duhet t’i drejtohet Asamblesë së Përgjithshme të OKB-së.

Theksoi se bisedimet në Nju Jork janë shumë të rëndësishme dhe se pret shumë prej tyre.

I pyetur për heqjen e taksave amerikane, ai tha se frikësohet se nuk do të ketë më shtyrje dhe se Serbia do të gjendet në një situatë jashtëzakonisht të vështirë.

„Nëse e zgjidhim çështjen e taksave, një kompani japoneze ka paralajmëruar investim shtesë prej 500 milionë eurosh. Unë jam shumë pesimist përndryshe dhe nuk dal me parashikime optimiste. Besoj se do ta zgjidhim këtë problem, se jemi në rrugë dhe nuk jemi larg që ta zgjidhim këtë çështje, shpresoj“, shpjegoi ai.

Vuçiq ka thënë se zgjidhja e taksave nuk është vetëm çështje e eksportit prej një miliard eurosh, por edhe e klimës investuese, për çka është e rëndësishme që kjo të zgjidhet sa më shpejt.

Për Serbinë është i rëndësishëm sinjali se SHBA duan dialog strategjik

Duke folur për dialogun strategjik të paralajmëruar mes Serbisë dhe SHBA-ve, presidenti Vuçiq theksoi se për Serbinë është një sinjal shumë i rëndësishëm që Shtetet e Bashkuara të Amerikës duan një dialog të tillë, pavarësisht mospajtimeve për disa çështje.

Ai kujtoi se SHBA e kanë ndërprerë dialogun strategjik me Prishtinën për shkak të veprimeve të fundit të Prishtinës dhe qëndrimit të Albin Kurtit, i cili, siç tha, nuk i respekton as ata që janë aleatët e tij më të afërt.

„Për ne ky dialog është shumë i rëndësishëm. Nuk duhet të jemi dakord për gjithçka. Nuk jemi dhe nuk do të jemi dakord për çështjen e Kosovës dhe Metohisë. Serbia është vend ushtarakisht neutral dhe nuk do të hyjë as në NATO, as në ODKB, as në ndonjë bllok ushtarak, sepse dëshiron të mbrojë vetë qiellin dhe tokën e saj. Nga kjo është e qartë se kemi një rrugë disi më të ngushtë dialogu sesa vendet e tjera, por për ne është i rëndësishëm sinjali se SHBA duan dialog strategjik me Serbinë. Kjo është e rëndësishme si për të gjithë investitorët në botë, ashtu edhe për sigurinë dhe stabilitetin“, shpjegoi Vuçiq.

Parada ushtarake – shfaqje e forcës si faktor pengues për çdo agresor potencial

Vuçiq u bëri thirrje qytetarëve që nesër të marrin pjesë në paradën ushtarake, ku, siç tha, do të mund të shohin ndryshimet e mëdha dhe gjithçka për të cilën është punuar 13 vjet.

„Kjo sot është një vend tjetër, jo vetëm për paga dhe pensione më të larta, kilometra autostradash apo hekurudhash, parqe shkencore-teknologjike, të cilat nuk ekzistonin, e sot janë pesë. Ushtria dhe policia jonë sot janë krahasimisht më të pajisura, më të forta“, tha Vuçiq.

Ai theksoi se vendimi zyrtar për mbajtjen e paradës është marrë që më 1 maj dhe se ajo nuk përgatitet me shpejtësi, për nevoja ditore.

„Kjo do të jetë krenaria e Serbisë. Duam të tregojmë çfarë kemi bërë, por edhe të japim një përgjigje penguese. Mos të bëhemi naivë, aleanca ushtarake e Prishtinës, Tiranës dhe Zagrebit nuk është krijuar për shkak të Austrisë, Greqisë, Sllovenisë, Rumanisë… por për shkak të Serbisë. Nuk është aleanca ushtarake e Zagrebit dhe Lubjanës, ku flitet kundër Serbisë dhe Republikës Sërpska, krijuar për shkak të Austrisë, por kundër Serbisë. Parada jonë ushtarake është shfaqje e forcës sonë si faktor pengues për çdo agresor potencial. Ne nuk duam të sulmojmë askënd, duam paqe. Duam ta ruajmë paqen. Paqen dhe stabilitetin nuk mund t’i ruani me dobësi, por me forcë“, theksoi Vuçiq.

Prandaj, sipas tij, parada mbahet nën emrin „Fuqia e unitetit“, sepse të dyja këto gjëra janë të rëndësishme për Serbinë.

„Për ne kjo është mënyra për të mbijetuar. Do të na kishin shkelur nëse nuk do të kishim ushtri të fortë. Do të shpiknin diçka, do të na shkelin. Sot askush nuk mund ta shkelë Serbinë. Serbia është një vend i qëndrueshëm“, përfundoi presidenti Vuçiq.